Eger biz AES salatyn bolsaq, kadr máselesinde táýelsiz bolýymyz kerek. Bul týraly ál-Farabi atyndaǵy Qazaq ulttyq ýniversitetiniń fizika-tehnikalyq fakýltetiniń dekany Nurzada Beisen «KazAtomEkspo» halyqaralyq iadrolyq energetika kórmesinde aitty.
Nurzada Beisenniń aitýynsha, fakýltette 90 jyldan astam ýaqyt boiy fizik-tehnikter daiyndalady. Sonymen qatar, biyldan bastap fakýltette iadrolyq injeneriia boiynsha jańa bilim berý baǵdarlamasy ashylǵan.
"Eger biz atom elektr stantsiiasyn (AES) salatyn bolsaq, kadr máselesinde ózgelerge arqa súiemeýimiz kerek. Bizge óz mamandarymyz ben jas ǵalymdarymyzdy daiyndap, jańa oqý baǵdarlamalaryn ázirleý qajet. Bizde osyǵan qajetti barlyq múmkindikter bar. Osy turǵydan alǵanda, bizdiń stýdentterimiz ben túlekterimiz bolashaq atom elektr stantsiiasynda jumys isteý úshin iri iadrolyq ortalyqtarda tájiribeden ótýi óte mańyzdy", — dedi Nurzada Beisen.
Sondai-aq, dekan stýdentterdiń biliktiligin arttyrý úshin qandai jaǵdailar jasalǵanyn atap ótti.
"Bizde qos diplomdyq baǵdarlamalar bar. Bizdiń stýdentterimiz Resei, Japoniia, Koreia, Qytai ýniversitetterinde oqidy. Jyl saiyn osy baǵdarlamalar boiynsha 10-15 stýdent bilim alady. Sonymen qatar, bizdiń stýdentter Shveitsariiada ornalasqan Eýropanyń eń iri iadrolyq zerthanasy — TsERN-da tájiribeden ótedi. Sońǵy jyldary jas ǵalymdarǵa kóp kóńil bólinip jatyr. Bul eldiń akademiialyq deńgeiin kóterý úshin mańyzdy qadam", — dep túiindedi fizika-tehnikalyq fakýltettiń dekany.
