Qazaqstan Jazýshylar odaǵy men Irannyń Jazýshylar qaýymdastyǵy ózara yntymaqtastyq týraly memorandýmǵa qol qoidy, dep habarlaidy "Ult aqparat".
Saltanatty rásim Astanada «Qazirgi zamanǵy sóz energiiasy» atty halyqaralyq ádebi forýmy aiasynda ótti. Forýmnyń ekinshi kúni proza, poeziia, dramatýrgiia jáne aýdarma isindegi ózekti máseleler 4 sektsiiaǵa bólinip talqylanýda.
«Qazaqstannyń zamanaýi ádebieti parsy tiline óte az aýdarylǵan. Búgingi memorandým parsy aýditoriiasyna qazaq ádebietin nasihattaýǵa jáne aýdarýǵa serpin beredi dep úmittenemin. Ekinshi jaǵynan, klassikalyq parsy ádebieti barsha álemge tanymal bolsa da, qazirgi parsy ádebietin biletinder az. Búgingi kelisimnen soń, qos halyqqa qazaq jáne parsy ádebietiniń zamanaýi ókilderi keńinen tanylaryna senimdimin», - dep atap ótti Iran jazýshylar qaýymdastyǵynyń tóraǵasy, aqyn, jazýshy Hadi Saeri Kiasari.
Óz kezeginde Qazaqstan Jazýshylar odaǵynyń basshysy Ulyqbek Esdáýlet eki eldiń baǵzydan qalyptasqan ádebi bailanysyn damyta túsýge nietti ekenin jetkizdi.
«Parsy ádebieti álemge asyl qazynalar syilaǵan bai ádebiet bolyp sanalady. Shahnamadan bastap, Rýmidiń, Jámidiń, Saǵdidyń, basqa da Shyǵys júldyzdarynyń shyǵarmalary bizde aýdarylyp kelgen. Árbir býyn uly aqyndar men jazýshylardy qaitalap aýdaryp usynyp otyrady. Bizde Turmaǵambet Iztileýovtan bastap, parsy tilinen aýdaratyn úlken aýdarmashylar mektebi qalyptasqan. Almatylyq Safar Abdýllo aýdarǵan M. Áýezovtyń áńgimeleri, Abaidyń qara sózderi osymen tórtinshi ret shyǵyp jatyr. Sol joldy jalǵastyryp, qazaq ádebietin parsy oqyrmandaryna tanystyra túsýdi kózdep otyrmyz», - dedi Ulybek Esdáýlet.
