QR Bilim jáne ǵylym ministri Ashat Aimaǵambetov tamyz aiynda saldyrǵan otandyq ekpeden keiingi densaýlyq jaǵdaiy týraly aityp berdi, dep habarlaidy QazAqparat.
«Bul – bizdiń Qazaqstan ǵalymdarynyń úlken áleýetin kórsetedi. Memleket basshysynyń tapsyrmasymen bizdiń ǵalymdarymyz óte úlken keremet jumys júrgizdi dep aitýymyz kerek. Keibir ýaqytta ǵalymdarymyzdyń qandai deńgeide ekenin túsinbei jatamyz, anda-sanda kommentariilerdi oqyp turamyn. Múmkin ózimiz de jetkizbeitin shyǵarmyz. Biraq ǵalymdarymyz osyndai keremet vaktsina daiyndap shyǵardy. Bul vaktsina óte qysqa merzimde daiyndaldy. Mamyr aiynda daiyn bolyp, klinikaǵa deiingi zertteýler júrgizilip bitken soń, birneshe ǵalym ózderine osy ekpeni salyp, ári qarai olardyń analizderin kórip, ekpe boiynsha esh qaýip joq ekenine kózimiz jetip otyrdy. Sondyqtan, osy jumyspen ainalysyp, kúndelikti osy aqparatty alyp júrgen soń, men de ǵalymdarymyzdy qoldaý úshin osy ekpeni ózime saldyrýǵa sheshim qabyldadym», - dep jaýap berdi Bilim ministri tilshi suraǵyna.
Ministr ekpeden keiin antideneler paida bolsa da, qaýipsizdik sharalaryn saqtap júrgenin jetkizdi.
«Ekpeni tamyz aiynda aldym, ózderińiz kórip otyrsyzdar, birneshe ai ótti. Eshqandai dene qyzýy, basqa da qiyndyqtar bolǵan joq. Immýnitet boiynsha tiisti antideneler paida boldy. Ony men Almatyǵa baryp, zertteý bolyp jatqan zerthanaǵa qanymdy tapsyrǵanda kózimiz jetti. Biraq, degenmen, osyndai immýnitet paida bolsa da, qazirgi ýaqytta da biz sanitarlyq talaptardy buzbaýymyz kerek. Maska taǵý boiynsha, araqashyqtyq saqtaý boiynsha barlyq talaptardy saqtap júrmin», - dedi Ashat Aimaǵambetov.
