Qazaqstandyq taekvondoshy Jansel Deniz jańartylǵan álemdik reitingide kósh basyna kóterildi, dep habarlaidy QazAqparat.
Bul Qazaqstan taekvondosy tarihynda tuńǵysh ret bolyp otyr.
Áielder arasynda 73 kelige deiingi salmaqta Deniz 139.81 balmen birinshi orynda keledi. Reseilik Polina Han (107.94) ekinshi, ońtústikkoreialyq Da Bin Li (105.60) úshinshi satyda.
Jansel burynǵy nusqada tórtinshi orynda edi.
Óz sporttyq jolynda Deniz 2017 jyly Taibeide jazǵy ýniversiadada jáne 2018 jyly Djakartada (Indoneziia) ótken Aziia oiyndarynda kúmis medalǵa qol jetkizdi. Sondai-aq ol – túrli halyqaralyq týrnirlerdiń chempiony hám júldegeri.
«Meniń armanym alysta bolyp kóringenimen, ol oryndaldy. Men búgin shyqqan jańartylǵan álemdik reitingide birinshi orynǵa ie boldym. Bul Qazaqstan taekvondosy tarihynda alǵash ret bolyp otyr. Men jalǵyz janashyrym – anama alǵys aitqym keledi. Ókinishke qarai, jolymda jeńilister, satqyndyq, aldaý da az bolǵan joq. Biraq, Álhamdýlillah, men osyndamyn. Qýanyshymdy bóliskenderdiń bárine rahmet. Sondai-aq barlyq musylman qaýymyn qasietti Ramazan aiynyń bastalýymen quttyqtaimyn. Duǵa-tilekterińiz qabyl bolsyn!
P.S. Myna sýretke 10 jyl buryn túsip edim. Maǵan óz armanymdy jazýdy ótingen. Men álemde №1 bolǵym keledi dep jazdym», dep jazdy Jansel Deniz Instagram-daǵy paraqshasynda.
