Qazaq ulttyq qyzdar pedagogikalyq ýniversitetiniń stýdentteri ósimdik maiynan biootyn jasap shyǵardy. Jas ǵalymdar Nazerke Halel men Mýnisa Saidiǵanievanyń jobasy halyqaralyq konferentsiiada júldeli oryn aldy. Joba jetekshisi – QazUPÝ doktoranty Gúlsara Aqanova. Ol ekologiialyq taza biootyn óndirýdiń biregei tehnologiiasyn jasaýmen birneshe jyl boiy ainalysyp keledi, dep habarlaidy BǴM baspasóz qyzmeti.
«Qazir kóptegen elder biootynǵa kóship jatyr. Shetelde negizinen qant qamysy, júgeri siiaqty ártúrli ósimdikterden óndiredi. Biz biootyn alý boiynsha óz tehnologiiamyzdy oilap taptyq jáne jasadyq. Jyldam tamaqtaný meiramhanalarynda ósimdik maiy kóp mólsherde paidalanylady jáne tamaq pisirgennen keiin ol jaramsyz bolyp qalady. Biz ony qaita óńdeýdi usynamyz. Ol úshin ósimdik maiyn usaq qospalardan tazartamyz, sodan keiin siltili katalizatordy jáne etil spirtin qosamyz. Osylaisha biootyn alamyz», – deidi basshy Gúlsara Aqanova.
Jas ǵalymdardyń jobasy birqatar ekologiialyq jáne ekonomikalyq máselelerdi sheshedi. Biootyn ekologiialyq taza jáne tiimdi, sonymen qatar arzan, qaýipsiz jáne tasymaldaýǵa yńǵaily.
Paidalanylǵan ósimdik maiynan biootyn alý tehnologiiasy jas ǵalymdar men stýdentterdiń «Farabi álemi» halyqaralyq konferentsiiasynda úzdikterdiń biri dep tanyldy. Ázirge bul – Qazaq ulttyq qyzdar pedagogikalyq ýniversiteti stýdentteriniń alǵashqy ǵylymi jetistigi. Aldaǵy ýaqytta Nazerke Halel men Mýnisa Saidiǵanieva jobalaryn jetildirip, startap jobalarǵa qatysýdy josparlap otyr.
