QR Mádeniet jáne sport vitse-ministri Serik Jarasbaev Beijińde ótetin Qysqy Olimpiadaǵa qazaqstandyq sportshylar qalai jetkiziletinin túsindirdi, dep habarlaidy QazAqparat.
«Qazirgi ýaqytta sportshylarymyz birneshe topqa bólindi. Birinshi top Eýropada daiyndalyp jatyr, sondyqtan olardyń Eýropadan tikelei Beijińge barý máselesin sheship jatyrmyz. Taǵy eki top – short-trek pen konki tebýshiler elordada «Alaý» muz aidynynda «Babl» júiesinde daiyndalyp jatyr. Qalǵan sport túrleri, fristail bolsyn, qysqy kópsaiys bolsyn Almatyda «Sadý» sport bazasynda daiyndalyp jatyr. Halyqaralyq Olimpiada talaptaryna sáikes, 14-27 qańtar aralyǵynda sol eki sport nysandarynda eshkimmen qarym-qatynas bolmaýy úshin jabylyp, «Babl» júiesinde daiyndalyp jatyr», - dedi S. Jarasbaev Ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, barlyq sportshylarymyz ekpe alǵan, olardyń densaýlyǵyna bailanysty barlyq jaǵdai jasalǵan.
«Bizdiń ulttyq qurama komanda, onyń ishinde elordadaǵy eki komanda 27 qańtarda charterlik reispen Almatyǵa ushady. Almatydaǵy qalǵan sportshylardy alyp, Beijiń qalasyna ushady. Beijińde 4 kún karantinde bolyp, ári qarai jarystarǵa daiyndyǵyn bastaidy», - dep túsindirdi vitse-ministr.
Aita keteiik, XXIV qysqy Olimpiada oiyndary Qytaidyń Beijiń qalasynda, 2022 jyldyń 4 men 20 aqpan aralyǵynda ótedi. Onda jalpy sany 109 medal sarapqa salynady. Jarystar Beijiń qalasynan bólek onyń qasyndaǵy Iantsin jáne Chjiantsziakoý qalalarynda da ótedi.
