Foto: olympic.kz
Qazaqstan short-trek quramasy 2026 jylǵy Olimpiada oiyndaryna bailanysty asa mańyzdy bolǵaly turǵan jańa maýsymǵa daiyndyqtyń kelesi kezeńine kiristi. Qazirgi ýaqytta ulttyq qurama Astanada oqý-jattyǵý jiynyn ótkizip jatyr. Aita keteiik, bul Petr Gamidov baptaityn komanda úshin biylǵy alǵashqy jiyn emes. Tolyǵyraq Olympic.kz materialynda, dep habarlaidy Ult.kz.
Sáýir men tamyz aralyǵynda qazaqstandyq short-trekshiler eki birdei jattyǵý jiynyn ótkizdi. Olimpiadalyq maýsymǵa daiyndyq sáýir aiynyń ortasynda bastaldy. Buǵan deiin sportshylar Álem kýbogy kezeńderi, Aziia oiyndary jáne álem chempionaty syndy mańyzdy jarystarǵa qatysyp, az ýaqyt demaldy. Ásirese, álem birinshiliginde Denis Nikishanyń kúmis júldesi – maýsymnyń basty jetistikteriniń biri boldy.
Maýsym óte qarqyndy ári kúrdeli ótti. Biraq tabysty boldy. Denis Nikishanyń joǵary nátijesi, Harbinde ótken Aziia oiyndaryndaǵy tarihi altyn medal, sondai-aq Álem kýbogynyń birneshe kezeńindegi kórsetkishter – sonyń dáleli. Quramaǵa demalýǵa kóp ýaqyt berilmedi. Óitkeni alda tek Olimpiada ǵana emes, sonymen qatar oǵan irikteý kezeńderi de kútip tur.
2026 jylǵy Olimpiada oiyndaryna joldama alý úshin short-trekten Álem kýbogynyń litsenziialyq kezeńderine qatysý qajet. Jeltoqsan aiynda bul jarysqa qatysatyn barlyq el belgili bolady. Qazaqstan quramasy aldaǵy Olimpiadada júldeli oryndarǵa talasa alady. Qazir barlyq kúsh-jiger daiyndyqqa jumsalyp otyr.
"Qazirgi ýaqytta jospar boiynsha daiyndalyp jatyrmyz. Maýsymǵa sáýirdiń ortasynda kiristik. Aldymen Túrkiiada velodaiyndyq jasadyq. Mamyr aiynda taýly jerde oqý-jattyǵý jiynyn ótkizdik. Sol aidan bastap, muzǵa shyqtyq. Qazir Astanada úshinshi jiynymyz ótip jatyr. Álem kýbogynyń irikteý kezeńderine deiin elordada jattyǵýdy jalǵastyramyz", – dedi bas bapker Petr Gamidov.
Mamannyń aitýynsha, daiyndyq josparly túrde júrip jatyr. Maýsymaralyq kezeńde josparlanǵan jumystardyń bári oryndalýda. Quramnyń negizgi oiynshylary qatarda, eleýli ózgerister joq. Sonymen qatar jattyqtyrýshy komanda ishinde de irikteý bolatynyn atap ótti.
"Quramanyń qazirgi jaǵdaiy jaqsy. Jattyǵý úderisi turaqty. Bári óz jolymen júrip jatyr. Barlyq maman qyzmet atqarýda, júie durys jolǵa qoiylǵan. Qyrkúiektiń 10-15 aralyǵynda ishki irikteý ótkizemiz. Sol irikteýdiń qorytyndysy boiynsha Olimpiadada el namysyn qorǵaityn quramany anyqtaimyz", – dedi ol.
Aita keterligi, Olimpiadaǵa baratyn quramaǵa avtomatty túrde engen birden-bir sportshy – Denis Nikisha. Bul sheshim 2025 jylǵy álem chempionatynan keiin qabyldanǵan. Esterińizge sala keteiik, Nikisha mansabynda ekinshi ret álem birinshiliginde kúmis medal ielendi.
Biyl ótetin alǵashqy tórt Álem kýbogy kezeńi (qazan jáne qarasha ailarynda) sheshýshi bolmaq. Ár qashyqtyq boiynsha litsenziialar sol jarystarda sarapqa salynady. Reiting te úlken ról atqarady. Sondyqtan basty maqsat - barlyq kezeńde joǵary nátije kórsetý. Budan bólek, komanda estafetada sátti óner kórsetse, qosymsha olimpiadalyq joldamaǵa qol jetkizedi.
Al 2026 jylǵy Olimpiada oiyndaryna tikelei daiyndyq qańtar aiynda bastalady.
