Qazaqstandyq shahmatshylar búginnen bastap dúniejúzilik onlain olimpiadada óner kórsetedi. Bizdiń sportshylar 21-23 tamyz aralyǵynda álemdegi eń myqty komandalarmen kúsh synasady, dep habarlaidy "Ult aqparat" Qazaqstan shahmat federatsiiasyna silteme jasap.
Shilde aiynyń birinshi jartysynda Halyqaralyq shahmat federatsiiasy (FIDE) tarihta tuńǵysh ret shahmattan dúniejúzilik olimpiadanyń onlain formatta ótkiziletinin habarlady. Oiyndar 2020 jyldyń 22 shildesinen 30 tamyzyna deiin ótedi.
Onlain Olimpiada 2020 - FIDE uiymyna múshe elderdiń ulttyq quramalary arasyndaǵy jalpy komandalyq jarys.
Jarys chess.com oiyn alańynda uiymdastyrylady jáne eki negizgi kezeńnen turady: «Diviziondar» jáne «Plei-off». Oǵan 163 ulttyq qurama komanda jáne álemniń 1500-den astam úzdik shahmatshysy qatysady.
Ár komanda quramynda alty negizgi jáne alty rezervtik oiynshy, sonymen qatar komanda kapitanynan turady. Birinshi qadamnan bastap ár júriske 15 minýt + 5 sekýnd beriledi.
Nona Gaprindashvili kýbogynyń kórsetkishterine sáikes, 2018 jyly Batými qalasynda ótken sońǵy olimpiadanyń nátijesi boiynsha, onlain Olimpiadanyń «Joǵarǵy divizion» qataryna álemniń 5 úzdik ulttyq quramasy (Úndistan, Qytai, Resei, Ýkraina, AQSh), tórt kontinentten 5 úmitker komanda men irikteý kezeńinen ótken 15 komanda engizildi.
Aziianyń shahmat federatsiiasy Qazaqstan quramasyn Joǵarǵy divizionǵa usyndy, bul topta bizdiń shahmatshylar 21-23 tamyz aralyǵynda álemdegi eń myqty komandalarmen kúsh synasady. Joǵary divizionnyń 40 komandasy 4 topqa bólinip, árqaisysynda ainalma týrniri ótkiziledi. Ár toptan úzdik úshtik: irikteý kezeńinen, shirek finaldan, jartylai finaldan jáne finaldan turatyn Plei-off kezeńine ótedi.
Onlain-olimpiadaǵa Qazaqstannyń erler quramasynan halyqaralyq grossmeisterler Rinat Jumabaev, Murtas Qajǵaleev, Rýstam Hýsnýtdinov jáne Anýar Ismaǵambetov, halyqaralyq sport sheberi Denis Mahnev jáne FIDE sheberi Ramazan Jalmahanov qatysady.
Elimizdiń áielder quramasynan halyqaralyq áielder grossmeisterleri Jansaia Ábdimálik, Bibisara Asaýbaeva, Gúlishan Nahbaeva jáne Gúlmira Dáýletova, áielder arasyndaǵy halyqaralyq sport sheberi Ásel Serikbai jáne áielder arasyndaǵy FIDE sheberi Merýert Kamalidenova qatysady.
Komanda kapitany – halyqaralyq grossmeister Pavel Kotsýr.
Bizdiń komandanyń eń jaqyn qarsylastary - Ázerbaijan, Vengriia, Ońtústik Afrika Respýblikasy, Ýkraina, Slovakiia, Ispaniia, Norvegiia, Frantsiia jáne Niderland.
Jarystyń birinshi kúni, 21 tamyzda Qazaqstan quramasy Slovakiia, Niderland (top-grossmeister Anish Giri jetekshilik etetin) jáne Ispaniia komandalaryna qarsy oinaidy.
Jarystyń transliatsiiasy týrnirdiń Olymp.FIDE.com veb-saitynda, álemniń barlyq tanymal tilderinde júrgiziledi.
