Qazaqstandyq pikirsaiys týrniriniń jeńimpazdary ýniversitet granty men 2 mln teńgeden astam syiaqylarmen marapattaldy, dep habarlaidy "Ult aqparat" bilim jáne ǵylym ministrliginiń resmi saityna silteme jasap.
Baspasóz qyzmetiniń málimetterine qaraǵanda, Sátbaev Ýniversitetinde 7–11 synyp oqýshylary men JOO stýdentteri arasynda «TECHNO CUP VI!» atty respýblikalyq pikirsaiys týrniri ótti. Oǵan irikteý kezeńinen ótken 400 pikirsaiysshy qatysty, olardyń arasynda elimizdiń ár óńirinen jáne respýblikalyq mańyzy bar qalalardan kelgen 128 mektep oqýshylary bar.
Týrnirdiń qorytyndysy boiynsha Mektep ligasynda Aqtóbe qalasyndaǵy M.Qurmanǵalieva atyndaǵy mektep-gimnaziianyń oqýshylary Álisher Qýanysh pen Aqyljan Iteǵulov jeńimpaz atandy. Olar Sátbaev Ýniversitetiniń bilim grantyn utyp aldy. Álisher qazir 10-shy synypta, Aqyljan 11-shy synypta oqidy.
«Biz mekteptegi pikirsaiys úiirmesine eki jyldan artyq qatysamyz. Pikirsaiys jarystary bizge unaidy, óitkeni onda sheshendik ónerdi, sheberlikti shyńdaisyń, halyq aldynda sóileýdi, syni turǵydan oilaýdy úirenesiń, sonymen qatar oi órisiń men erýditsiia daǵdylaryńdy damytasyń. Pikirsaiys týrniriniń jeńimpazy atanyp, Sátbaev Ýniversitetiniń bilim grantyn jeńip alǵanyma óte qýanyshtymyn», – dedi Aqyljan Iteǵulov.
Qazaq jáne orys ligalarynyń jeńimpazdary, sondai-aq týrnirdiń úzdik spikerleri jalpy somasy 2 million teńgeden astam aqshalai syilyq aldy. Sondai-aq «Úzdik tóreshi» nominatsiiasynyń iegeri anyqtaldy, atalǵan nominatsiia boiynsha HATI-nyń stýdenti Ýliana Vilemson jeńimpaz atandy.
Aita keteiik, týrnir amerikalyq, britandyq parlamenttik pikirsaiys formattarynyń erejeleri jáne Linkoln-Dýglas erejeleri boiynsha ótti. Finaldyq oiynnyń qorytyndysy boiynsha Radioelektronika jáne bailanys áskeri-injenerlik institýtynyń «Patriot» pikirsaiys klýby úzdik delegatsiia atandy.
