Qazaqstandyq parataekvondoshy Málik Muqashev Ystanbulda márege jetken álem chempionatynda jeńimpaz atandy, dep habarlaidy QazAqparat tilshisi.
Bapkeri Erbol Merǵalievtiń aitýynsha, Málik Muqashev 80 kg salmaqta aldymen túrik sportshysyn utty.
Finalda reseilik parataekvondoshymen shyǵyp, eki sekýnd qalǵanda, qarsylasyn 41:39 esebimen jeńdi.
Málik buǵan deiin álem birinshiliginde jeti jyldan beri baq synap, úzdik nátijesi – besinshi orynmen shektelgen edi. Biyl Málik Muqashev Aziia, Eýropa birinshiligi, Qazaqstan spartakiadasy, endi, mine, álem chempionatynda jeńis tuǵyryna kóterilip, tórt altyn medaldi jeńip alyp otyr.
BQO dene shynyqtyrý jáne sport basqarmasynan alynǵan málimetke qaraǵanda, Málik Muqashev 1986 jyly Oral qalasynda dúniege kelgen.
Terekti aýdany Podstepnyi aýylynda orta mektepte bilim alǵan. 1998 jyly Bórli aýdany ortalyǵy Aqsai qalasyna qonys aýdarǵan. 2000 jyly tok soǵyp, qatty kúiik alyp, eki qolynan aiyrylǵan. Aqsaidaǵy №3 orta mektepti, sosyn 2006 jyly Oral qalasyndaǵy qarjy-ekonomikalyq kolledjin býhgalterlik esep jáne aýdit mamandyǵy boiynsha bitirgen. Batys Qazaqstan injenerlik-tehnologiialyq ýniversitetinde joǵary bilim alyp, dene shynyqtyrý pániniń muǵalimi atandy.
2014 jyldan bastap taekvando jattyqtyrýshysy Erbol Merǵalievtiń qolastynda jattyǵyp keledi. Sol jyly parataekvandodan Eýropa ashyq chempionatynda qola júldege ie boldy. 2016-2018 jyldary Aziia chempionatynyń úsh dúrkin júldegeri atandy. 2019 jyly Eýropa chempiony ataǵyna qol jetkizdi.
Biyl Livan astanasy Beirýt qalasynda ótken VI Aziia chempionatynda úzdik shyqqan BQO múmkindikteri shekteýli adamdarǵa arnalǵan sport klýbynyń sportshysy, bórlilik Málik Muqashevqa tirek-qimyl apparaty zaqymdalǵan sportshylar arasynda parataekvondodan halyqaralyq dárejedegi sport sheberi ataǵy berildi.
