Qazaqstandyq erkin kúres palýany Dáýlet Shabanbai London-2012 qola medalin ielendi, - dep habarlaidy Tengrinews.kz agenttigi Olympic.kz saityna silteme jasap.
Marapatty saltanatty túrde tapsyrý rásimi Belgradtaǵy kúresten álem chempionatynda ótken. Sportshy medaldi Birikken kúres áleminiń (UWW) basshysy, HOK atqarýshy komitetiniń múshesi Nenad Lalovichtiń qolynan alǵan.
"Qymbatty dostar, týǵan halqym, Qazaqstanym. Allaǵa shúkir, kópten kútken medaldi aldym! Halyqaralyq Olimpiada komitetine, Nenad Lalovich myrzaǵa, Birikken kúres áleminiń prezidentine, Qazaqstan Respýblikasy Ulttyq Olimpiada komitetiniń, Ulttyq federatsiianyń basshylyǵyna rizamyn. Barlyǵy meni jeke quttyqtaǵanyna qatty qýanyshtymyn. Bizdiń sportshylar chempion bolsyn. Daiyndalyńdar, jigitter!" - dedi Dáýlet Shabanbai.
"Dáýlettiń marapaty on jyldan keiin de sportshynyń kúsh-jigeri men sheberliginiń, sondai-aq, búkil komandanyń tiimdi jumysynyń kórinisi sanalady. Ony baǵalamaýǵa bolmaidy. Bul - bizdiń palýannyń zańdy úshinshi orny. Birikken kúres álemine Olimpiada medalin berý sharasyn uiymdastyrǵany úshin alǵysymdy bildiremin", - dedi Qazaqstan Ulttyq Olimpiada komitetiniń bas hatshysy Andrei Kriýkov.
Sportshy marapattar qaita bólingennen keiin Olimpiada oiyndarynyń júldegerleri qataryna engen. Londondaǵy Olimpiadada Dáýlet Shabanbai 120 kelige deiingi salmaq dárejesindegi oiyndy besinshi orynda aiaqtaǵan. Alaida 2019 jyly doping-synamalar qaita tekserilgennen keiin grýzin palýany David Modzmanashvili men Artýr Taimazov (Ózbekstan) tyiym salynǵan zattardy qoldanǵanyna bailanysty sottalǵan.
Barlyq synaqtan keiin osy sportshylardy shettetý, olardyń Londondaǵy Olimpiadada kórsetken nátijelerin joiý týraly sheshim qabyldanǵan. Osylaisha, Dáýlet Shabanbai oiyndardyń qola júldegeri atanǵan.
Aita keteiik, Dáýlet Shabanbai - Aziia chempionatynyń tórt dúrkin qola júldegeri (2008, 2009, 2011, 2014). Sondai-aq, ol 2014 jyly Aziia oiyndarynyń kúmis medaline ie bolǵan.
