Foto: ashyq derekkóz
Qazaqstannyń mádenieti taǵy bir biik belesti baǵyndyrdy. Opera ánshisi Áigerim Altynbek Italiiada ótken XI halyqaralyq Concorso Lirico Internazionale di Portofino (CLIP) 2025 vokaldyq baiqaýynda absoliýtti jeńimpaz atandy. Bul týraly Mádeniet jáne aqparat ministrligi málimdedi, dep habarlaidy Ult.kz.
Áigerim birinshi oryndy ǵana emes, sondai-aq:
-
«Kórermen kózaiymy»,
-
«Úzdik áiel daýysy»,
-
ataqty mýzyka synshysy Karlo Maierdyń arnaiy júldesin ielendi.
Bul – Ortalyq Aziia tarihynda alǵash ret atalmysh baiqaýda mundai aýqymdy jeńiske jetken ónerpaz. Qazylar alqasynyń tóraǵasy Dominik Meierdiń aitýynsha, «Áigerim saiys bastalǵaly barlyq qazylar reitinginde úzdik boldy. Mundai jaǵdai óte sirek kezdesedi jáne kórermenniń de tańdaýynyń ádil bolǵanyn aiǵaqtaidy».
Finalǵa álemniń túkpir-túkpirinen 200-ge jýyq ótinim ishinen bar bolǵany 10 vokalist ótken. Olar Portofino qalasynyń ortalyq alańynda, Teatro Carlo Felice orkestriniń súiemeldeýimen óner kórsetti.
«Úzdik áiel daýysy» júldesin Áigerimge Chilidegi Ibanes-Atkinson qory tabystady. Bul – álem boiynsha jas daryndy vokalisterdi qoldaityn halyqaralyq uiym. Aita keteiik, Áigerim – Ońtústik Amerika qurlyǵynda qoldaý tapqan tuńǵysh eýropalyq emes ánshi.
Sarapshylar bul jeńisti qazaqstandyq vokal mektebiniń halyqaralyq deńgeide moiyndalýy dep baǵalap otyr. Áigerimge shet elderde shyǵarmashylyq múmkindikterin keńeitýge baǵyttalǵan birneshe kásibi usynystar jasalǵan.
Eske salaiyq, CLIP – Vena operasy, La Skala, Metropoliten syndy álemdik teatrlardyń jetekshileri qatysatyn álemdegi eń bedeldi vokaldyq baiqaýlardyń biri.
