Sýret: Depositphotos.com
Mektepterde tym kóp pán oqytylady, al oqýlyqtar oqýshyǵa túsinýge qiyn ǵylymi tilde jazylady. Altynbek Nýhuly óziniń depýtattyq saýalynda mektep baǵdarlamasy kóleminiń shamadan tys bolýy men orta bilim berý sapasynyń problemasyn kóterdi, dep habarlaidy "Ult aqparat" Senattyń baspasóz qyzmetine silteme jasap.
Senatordyń aitýynsha, bilim sapasy jaǵynan alǵa ketken Japoniia, Ońtústik Koreia, Finliandiia jáne Kanada siiaqty elderde 7-8 synypta naqty ǵylymǵa qatysty 4-6 pán oqidy, al Qazaqstanda 15 pán, al 9 synypta tipti 16 pán oqytylady. Al bizde mindetti oqý pánderiniń sany 2,5 ese kóp. Sonymen qatar, himiia, biologiia jáne geografiia siiaqty oqý pánderi sheteldiń mektebinde bir «Ǵylym» pánine biriktirilip, óte az ýaqyt oqytylady.
Osyǵan qaramastan, sońǵy 15 jyldaǵy halyqaralyq PISA zertteýiniń qorytyndysy boiynsha osy elderdegi oqýshylardyń jaratylystaný ǵylymy boiynsha saýattylyǵy joǵary bolyp otyr. Bul pánder sanynan oqytý sapasy mańyzdy ekenin kórsetedi.
«Qazaqstanda mektep oqýshylaryna taqyryp boiynsha shamadan tys kólemdi aqparat beriledi jáne oqýlyqtardyń tili aýyr ári ǵylymi sipatta beriledi. Al ozyq eldiń taǵy biri Ulybritaniiada – kerisinshe, aqparat kólemdi emes, taqyryptar tájiribege baǵyttalyp, kúndelikti ómirdiń jaǵdaiattarymen bailanystyrylyp oqytylady. Basqasha aitqanda, oqýshynyń aldaǵy ómirinde pragmatikalyq turǵydan qanshalyqty mańyzdy ekenin túsindirýge kóp kóńil bólinedi, iaǵni oqýshylardyń quzirettiligin qalyptastyratyn nátijege baǵdarlanǵan bilim beriledi. Orta bilim berý salasynda sapaly bilim berý úshin, oqýshylarǵa zaman talabyna sai bilim berý mazmunyn jasaý kerek. Orta bilim berý sapasyn kóterýdiń Kontseptsiiasyna sáikesinshe ózgerister engizilýi kerek dep esepteimiz», - dedi Altynbek Nýhuly.
