Qazaqstandyq «Nik Výichich» atanǵan Áli Turǵanbekov óz qolymen aǵylshynnyń Liverpýl oiynshylaryna ÝEFA Sýperkýbogyn tabystady, dep habarlaidy QazAqparat.
Áli jeńimpazdarǵa kýbokty tabystaý rásimin ÝEFA prezidenti Aleksander Cheferinmen birge ótkizdi. Finalda «Liverpýl» óziniń «Chelsidi» penalti qorytyndysy boiynsha jeńgen bolatyn.
Eki aiaqsyz dúniege kelgen Áli Turǵanbekov «Chelsi» jáne «Liverpýl» fýtbol komandalarynyń juldyzdarymen kezdesetini buǵan deiin habarlanǵan bolatyn.
«Dostar, men ÝEFA-nyń Sýperkýbogyna shaqyrtý aldym. Onda Chempiondar ligasy men Eýropa ligasynyń ótken maýsymdaǵy jeńimpazdary - «Liverpýl» men «Chelsi» kezdesedi. Qýanyshymda shek joq», - dep bólisken edi Áli óz qýanyshymen Instagram-daǵy paraqshasynda.
«Liverpýl» jańa eýromaýsymdy ashar matchyn «Chelsimen» Ystanbulda oinady. Túrik jurtyna baryp qaitqansha Álidiń paraqshasy Muhammed Salah, Roberto Firmino sekildi juldyzdarmen, komandanyń bas bapkeri Iýrgen Kloppen túsken sýrettermen toldy.
Áli tipti áigili fýtbol juldyzy Lionel Messimen de kezdesip, fotosýretke túsken. Oǵan deiin Álidi frantsýzdyń «Pari-Sen-Jermen» komandasynyń juldyzdary Killian Mbappe, Edinson Kavani men Neimar shaqyrǵan edi.
Al 2017 jyldyń jeltoqsan aiynda Áli óziniń kýmiri Nik Výichichpen júzdesken bolatyn.
