Qazaqstandyq jekemenshik, memlekettik jáne kvazimemlekettik kompaniialardyń qyzmetkerleri 700 aǵashty qutqaryp, 1,4 mln litr sý únemdedi. Bul týraly ECOJER Qazaqstanyń óńirlik ekologiialyq bastamalar qaýymdastyǵynan málim etti dep habarlaidy "Ult aqparat".
«Qazaqstanda «Jasyl keńse« ekologiialyq jobasynyń qorytyndysy tanystyryldy. Onyń maqsaty - uiymdardyń «kómirtek izin» tómendetý, resýrstardy paidalanýdy qysqartý, sonymen qatar qyzmetkerler men olardyń otbasy múshelerin ekomádenietke úiretý. Jobaǵa menshik nysanyna jáne qyzmetkerleriniń sanyna qaramastan otandyq kompaniialar tartyldy. Olardyń qataryna 10 qyzmetkeri bar shaǵyn uiymdarmen qatar birneshe myń qyzmetker jumys isteitin iri bankter de boldy», - dep atap ótedi qaýymdastyqtan.
Jobanyń ózi birneshe kezeńmen júzege asyrylady. Eń aldymen keńselerde qaldyqtardy - qaǵazdardy, shynyny, plastik pen metaldy bólip jinaýǵa arnalǵan ekojáshikter ornatylady. Sodan keiin qyzmetkerlerge qaldyqtardy odan ary óńdeý úshin suryptaý erejesi oqytylyp, únemi keńes berilip otyrady. Suryptaý daǵdyǵa ainalǵannan keiin bizneske qaldyqtar sanyn azaitý jáne resýrstardy únemdeý boiynsha daiyn sheshimder usynylady.
«Barlyq qujat ainalymy elektrondy formatqa kóshiriledi. Kez kelgen tanystyrylymdar, qyzmettik jazbalar, kelisýler tek elektrondy túrde júrgiziledi. Bul karantin ýaqytynda óte yńǵaily boldy. Sonymen qatar keńselerde jaryqty, sýdy jáne jylýdy únemdeýge arnalǵan tehnologiialar engiziledi. Bir rettik ydys-aiaqtardy paidalanýdan korporativtik bas tartý qolǵa alynady. Óitkeni, olar ekologiiamen qatar adamnyń densaýlyǵy úshin de ziiandy. Qyzmetkerler aýaǵa ziiandy shyǵaryndylardy azaitý úshin jeke kólikterimen júrýin qysqartady. Buǵan qosa, árbir keńse ai saiyn qansha resýrs únemdegendigin eseptep, kórsetkishterin jaqsarta túsýge umtylady», - dedi «Jasyl keńse» jobasynyń bastamashysy Evgenii Muhamedjanov.
«Jasyl keńse» jobasy bir jyldyń ishinde 700 aǵashty otalýynan qorǵap qalyp, 1,4 mln litr sý, 69 kVt elektr energiiasyn únemdep, 118 myń keli kómir qyshqyl gazynyń shyǵarylýyn qysqartqan. Búginde jobaǵa elimizdiń 85 kompaniiasy men olarda jumys isteitin 18 myń qyzmetker qatysady. Olardyń qatarynda uialy bailanys operatorlary, bankter, qarjy uiymdary, saýda ortalyqtary, meiramhanalar men qoǵamdyq tamaqtaný oryndary bar. Taiaýda ǵana Nur-Sultan qalasynyń halyqaralyq áýejaiy da «Jasyl keńse» jobasyna qosyldy.
