Úkimette ótken baspasóz konferentsiiasynda jýrnalisterge elimizdegi maskalardyń tapshylyǵyna bailanysty suraqqa qatysty túsinik berildi, dep habarlaidy "Ult aqparat".
QR Premer-Ministriniń orynbasary E. Toǵjanov elimizdiń maskalarmen tolyq qamtamasyz etiletinin aitty.
«Árine, jekelegen dárihanalarda búginde shynymen de maskalar joq shyǵar. Biz oǵan kepildik bere almaimyz. Bul taqyryp kóterilgen alǵashqy kúnderi Qazaqstanda ǵana emes, kóptegen elderde osyndai dúrbeleń oryn aldy. Sondyqtan, árine, belgili bir tapshylyq boldy. Biraq qazir bul máseleniń barlyǵy tolyǵymen memlekettiń baqylaýyna alynǵan. Maskamen qamtamasyz etý máselesi búginde kún tártibinde tur. Bizdiń óz kompaniialarymyz bar, sondyqtan barlyq memleketter qazir osy máselege alańdaýshylyq bildirip otyr, ózderi shyǵaratyn maskalardy jibermeidi. Sol sebepti bizdiń barlyq tórt kompaniia tolyq jumys istep jatyr. Qazaqstan maskalarmen tolyq kólemde qamtamasyz etiledi. Taǵy da aitamyn, eger jekelegen dárihanalarda maskalar bolmai qalsa, ol Qazaqstanda bizdiń buǵan ázir emestigimizdi bildirmeidi», — dedi Toǵjanov.
Sondai-aq ol naqty memlekettik organdarǵa, eń aldymen, shekara mańy jáne keden qyzmetterine Qazaqstan shekarasynan tys jerlerge maskalardy shyǵarýǵa qatań tyiym salý týraly tapsyrma berilgenin habarlady. E. Toǵjanovtyń aitýynsha, mundai áreketter, eń aldymen, Qazaqstannan Qytaiǵa jetkizý turǵysynan oryn alǵan.
Densaýlyq saqtaý ministri E. Birtanovtyń aitýynsha, deni saý adamǵa maska kiiýdiń qajeti joq. Eń aldymen, maskalar naýqastar men táýlik boiy túrli infektsiialary bar patsienttermen bailanysqa túsetin meditsina qyzmetkerleri jumys isteitin meditsinalyq mekemelerde mindetti túrde bolýy tiis.
«Biz meditsina uiymdaryna adamdardy qorǵaý úshin qor qalyptastyrdyq. Eger siz ózińiz aýyryp júrseńiz, tipten qarapaiym tumaý bolsa da, ainalańyzdaǵy adamdardy qorǵaý úshin maska taǵyp júrýińiz qajet. Oryn alǵan dúrbeleń, baibalam úlken shyǵyn ákelýde, sebebi bólshek saýdadaǵy búkil kólemdi azamattar búginde satyp alǵan. Qosymsha óndirý máselesi qaralyp jatyr», — dedi densaýlyq saqtaý ministri.
Óz kezeginde QR indýstriia jáne infraqurylymdyq damý vitse-ministri Berik Qamaliev qazaqstandyq kásiporyndardyń ónimdiligi táýligine 170 myń maskany qurap otyrǵanyn habarlady.
«Ai saiyn bul kásiporyndar 5 mln dana maska shyǵarady. Ony 6,5 mln danaǵa deiin kóbeitýge múmkindik bar. Sondyqtan Densaýlyq saqtaý ministrligimen birlesip, Premer-Ministrdiń tapsyrmasy boiynsha biz olardy qamtamasyz etýmen ainalysyp jatyrmyz. Olardyń shikizaty jyl sońyna deiin jetkilikti. Tek bir kompaniiada QHR-dan jetkizýshiler shikizat ornyna meditsinalyq maskalardyń 50%-yn berýdi suraǵan jaǵdai boldy. Bul másele sheshildi», — dedi B. Qamaliev.
