Qazaqstandyq kásipker Eldos Aibekov Afrika qurlyǵyndaǵy aýyzsýǵa muqtaj halyqqa qudyq qazyp berdi, - dep habarlaidy Tengrinews.kz tilshisi.
Qazaqstan atynan syiǵa tartylǵan qudyq Ýganda memleketindegi Nanoko eldi mekeninde ornalasqan. Kásipker Ýgandanyń The Ngali Development Foundation (Ngali damytý qory) kompaniiasymen bailanysyp, nátijesinde qudyq qazý úshin ekijaqty kelisimge kelgen. Qudyqtyń qurylysy aqpanda bastalyp, 12 naýryzda aiaqtaldy. 13 naýryzda ashylý saltanaty uiymdastyrylyp, jergilikti turǵyndar qazaqstandyqtarǵa alǵysyn bildirgen.
"Biz taza sýǵa qoljetkize almai otyrǵan aýyl turǵyndarymyz. Qarapaiym turmys keshemiz. Azyn-aýlaq eshki ustaimyz. Qazir sýdy 5 shaqyrym jerdegi ózennen tasyp iship otyrmyz. Bul árine taza sý emes. Munyń bárin balalarymyz tasyp ákeledi. Mototsikl, velosipedi bar adamdar sirek. Kóbine jaiaý tasyimyz. Búgin Eldos Aibek degen myrza jerimizge kelip, aýyldyń qaq ortasynan úlken qudyq qazyp berdi. Alǵysymyzda shek joq. Balalardyń qalai qýanǵanyn kórdińiz be?! Olardyń qýanyshyn kórip biz de erekshe qýanyp turmyz. Eldos myrzaǵa kóp raqmet. Alla istegen jumysyna bereke bersin. Biz Qazaqstan degen memleket jaily múlde bilmeitin edik. Osy jaǵdaidan keiin eshqashan umytpastai boldyq. Qazirgi qýanyshty kórgen balalar Qazaqstandy, kók týlaryńyzdy máńgi jadynda saqtap qalary anyq. Qazaqstanǵa sálem!" - deidi 63 jastaǵy aýyl turǵyny Sooka Sharif (30 balasy bar).
"Qudyq qazýǵa qatysty bizde eki tańdaý boldy. Biri - Ýganda, ekinshisi - Keniia. Ekeýi de Shyǵys Afrikada ornalasqan. Alǵashynda qudyqty Keniiadan qazamyz dep oiladyq. Óitkeni, Keniiadaǵy qyzmettiń baǵasy Ýgandaǵa qaraǵanda arzan boldy. Keiin qos memleketke analiz jasap, Ýgandanyń JIÓ-si Keniiadan 3 ese tómen ekenin kórdik. Oilana kele, qudyqty taza sýǵa shyn muqtaj halyqqa qazyp bereiik degen qorytyndyǵa keldik. Búgin qudyǵymyzdy qoldanysqa berdik. Turǵyndardyń, balalardyń qýanyshyn kórip erekshe tolqynysty kúi keshtim. Bul jobamyz Qazaqstan men Ýganda memleketteriniń arasyndaǵy bailanysty nyǵaita túsedi degen senimdemiz", - deidi Eldos Aibekov.
Ashylý saltanatyna qaiyrymdylyq sharaǵa qoldaý kórsetý maqsatynda qazaqstandyq saiahatshy-bloger Iakov Fedorov ta barǵan. 65 memleketti aralaǵan Iakov myrza bul jolǵy sapardyń áseri bólek ekenin aitty.
Iakov Fedorov: "Ýganda 5 patshalyqtan quralǵan. Olar memleket biliginen tys jeke patshalyqtarǵa bólinip ómir súredi. Eń úlken patshalyq - Býganda. Ekinshisi - Býsoga. Qudyq dál osy býsogalyqtarǵa tiesili jerden qazyldy. Olar lýsoga tilinde sóileidi.
Men Eldos myrzaǵa kóp alǵys bildiremin. Ol kisi ǵalamdyq máselege óz úlesin qosty. Sý - Afrika halqynyń eń úlken máseleleriniń biri. Búgin aiadai ǵana aýyldyń problemasy sheshildi".
Qudyq qoldanysqa berilgennen keiin Eldos Aibek Qazaqstannan arnaiy aparǵan mektep jabdyqtaryn úlestirdi. Memlekettik jalaýymyz beinelengen dápter, qalam, qalamsap, sómkeni nonokolyq balalarǵa taratyp berdi. Qýanyshpen bastalǵan jiyn qýanyshpen aiaqtaldy. Aýyl turǵyndaryna 2 qazan palaý taratylyp, balalarǵa táttiler berilgen.
Eldos Aibekov – kásipker. ShQO, Aiagóz aýdany, Aiagóz qalasynyń týmasy. Qazaqstan, TMD biznes naryǵynda 15 jylǵa jýyq kásippen ainalysyp keledi. Ol osy ýaqytqa deiin birneshe qaiyrymdylyq aktsiialaryn uiymdastyrdy. Naqtyraq aitsaq, jalpy quny 15 million turatyn DTsP-naýqastaryna arnalǵan apparattardy tegin taratqan. Ai saiyn áleýmettik turmysy tómen otbasylarǵa azyq-túlik, materialdyq, qarjylyq kómek kórsetedi. 2021-2022 oqý jyly qarsańynda 100 oqýshyny mektep jabdyqtarymen qamtamasyz etti. Eldos Aibekov – "Raiymbek batyr" qaiyrymdylyq mekemesiniń demeýshisi.
