Otandyq ǵalymdar diabettik retinopatiiany qashyqtan diagnostikalaýǵa arnalǵan biregei baǵdarlamalyq joba ázirledi. Ol kóz túbiniń aýrýlaryn 90% dáldikpen anyqtaýǵa múmkindik beredi.
Jobany QR Bilim jáne ǵylym ministrligi qarjylandyrady. Ol qazirdiń ózinde Nur-Sultan men Almaty qalalaryndaǵy, sondai-aq Soltústik Qazaqstan, Shyǵys Qazaqstan, Túrkistan, Aqmola oblystaryndaǵy 17 memlekettik jáne jekemenshik emhanada engizilgen.
Biregei skrining júiesin ázirleýshi Erkebulan Jánibekulynyń aitýynsha, kóz túbin sýretke túsirýdiń jańa tsifrlyq ádisi oftalmoskoptyń kómegimen kóz túbin tekserýdiń qolmen jasalatyn ádisine qaraǵanda obektivti bolyp esepteledi. Sondai-aq ol dáriger men patsienttiń ýaqytyn jáne qarajatyn únemdeidi.
«Bizdiń júie diagnostikada jańa tásildi kózdeidi. Endi naýqastyń kóz túbin sýretke túsirýdi shalǵai aýyldyq eldi mekendegi meditsinalyq personal júrgize alady, al aýdan nemese oblys ortalyǵyndaǵy oftalmolog dáriger qashyqtan qorytyndy jasai alady. Sonymen qatar jasandy intellekt algoritmi diabettik retinopatiianyń bolýyn, onyń satysyn joǵary dáldikpen anyqtaidy jáne kóz túbiniń tolyq sipattamasyn beredi. Diabettik retinopatiia – qant diabetiniń asqynýy jáne ol tolyq soqyrlyqqa ákelýi múmkin. Sol sebepti aýrýdy erte kezeńde anyqtaý óte mańyzdy. Bizdiń júiedegi jasandy intellekt algoritminiń dáldigi 91%-dy quraidy», - dep túsindirdi ǵalym Erkebulan Jánibekuly.
Baǵdarlamanyń taǵy bir ereksheligi – dárigerdiń qorytyndysy EyeLab platformasy men Damumed meditsinalyq aqparattyq júiesin biriktirý arqyly patsienttiń elektrondy densaýlyq pasportyna tirkeledi. Aldaǵy ýaqytta platformany engizilý arqyly diabettik retinopatiianyń skriningtik protsedýrasyn tolyǵymen tsifrlandyrý josparlanyp otyr.
Halyqaralyq diabet federatsiiasynyń deregi boiynsha, 2021 jyly álemde qant diabetimen aýyratyn 537 mln eresek adam tirkelgen. Qazaqstanda bul kórsetkish shamamen 400 myń adamdy quraidy. Otandyq ǵalymdar ázirlegen qant diabetiniń asqynýlaryn qashyqtan diagnostikalaýdyń jańa júiesi halyqqa meditsinalyq qyzmet kórsetýdiń tiimdiligin, qoljetimdiligin jáne sapasyn aitarlyqtai arttyrady.
