Tanymal otandyq himik ǵalym Zulqaiyr Mansurovqa IýNESKO-nyń «Nanoǵylym men nanotehnologiialar damýyna qosqan úlesi úshin» medali tabystaldy. Marapattaý rásimi 22 qarashada atalǵan uiymnyń Parijdegi bas páterinde ótti, dep habarlaidy QR SIM baspasóz qyzmeti.
Medal tujyrymdamasyn 2010 jyly IýNESKO Bas direktory bekitip, sol kezden beri ol jyl saiyn osy saladaǵy álemdik ǵylymnyń alǵa basýyna eleýli úles qosqan kórnekti ǵalymdar men uiymdarǵa beriledi. Otandyq ǵalym biyl óziniń «nanokómirtek materialdaryn óńdeý, kómirtekti nanotútikter men grafenderdi janý kúiinde sintezdeý tehnologiialaryna zertteýge qosqan úlesi» úshin marapattaldy.
Medaldi tabystaýdan keiin sóilegen sózinde Z. Mansurov IýNESKO-ǵa júrgizgen zertteýlerine osyndai joǵary baǵa bergeni úshin rizashylyǵyn bildirip, qazaqstandyq ǵylymnyń jeńisterin búgingi tańda ǵalymdarymyz, ásirese jastar, álemniń jetekshi zertteý ortalyqtarymen tyǵyz yntymaqtastyq ornatýǵa barlyq múmkindikterge ie ekenimen bailanystyrdy jáne oǵan jaǵdai jasaǵan Elbasy bastamasymen júrgizilgen júieli reformalardyń arqasy ekenin atap ótti.
Rásimge qatysqan Qazaqstannyń IýNESKO janyndaǵy Turaqty ókili Jan Ǵaliev otandasymyzdy jyly quttyqtap, osy medaldiń onyń otandyq jáne halyqaralyq ǵylymi qaýymdastyqqa sińirgen adal eńbegi, nanoǵylym men nanotehnologiialarǵa qosqan mańyzdy úlesiniń laiyqty moiyndaýy retinde qarastyratynyn jetkizdi.
Biyl atalǵan marapatqa Mansurovtyń Resei, Frantsiia, Aýstraliia, Finliandiia, Aýstriia, Grekiia, Mysyr men AQSh siiaqty memleketterde eńbek etip júrgen taǵy da toǵyz áriptesi ie boldy. Zertteýleriniń naqty qoldanys salalaryna elektronika, telekommýnikatsiialar, mashina jáne qural jasaý, meditsina, materialtaný men kóptegen basqalar jatady. Medalmen osy kezge deiin marapattalǵandar arasynda fizika salasyndaǵy Nobel syilyǵynyń laýreattary Isamý Akasaki men Jores Alferov, Qytai ǵylym akademiiasynyń prezidenti Chýnli Bai bar.
Professor, himiia ǵylymdarynyń doktory Zulqaiyr Aitmuhametuly Mansurov QR BǴM Janý problemalary institýtynyń Bas direktory. Tanymal ǵalym kóp jyldar boiy Ál-Farabi atyndaǵy Qazaq Ulttyq Ýniversitetinde kóp jyldar boiy eńbek etti, sonyń ishinde on bes jyl boiy prorektor retinde. Qazaqstan Respýblikasynyń Memlekettik premiiasy men Qanysh Satpaev atyndaǵy premiianyń laýreaty.
