Y. Altynsarin atyndaǵy Ulttyq bilim akademiiasynda «Ybyraitaný álemi – ulttyq qundylyǵymyz!» atty dóńgelek ústel ótti, dep habarlaidy "Ult aqparat".
Dóńgelek ústelge Táýelsizdik alǵannan beri Akademiiada qyzmet etken qurmetti ardagerler, Y. Altynsarinniń ómiri men qyzmetin, shyǵarmashylyǵyn zertteýshi ǵalymdar, akademiianyń ǵalymdary men qyzmetkerleri, sarapshylar jinaldy. Sondai-aq Akademiianyń táýelsizdik jyldaryndaǵy basshylary J. Dadebaev, Ó. Ozǵanbaev, Q. Arynov, A.Qusaiynov, T. Balyqbaev, J. Jylbaevta qatysty.
Dóńgelek ústeldiń maqsaty Y. Altynsarinniń eńbekterin jastarǵa, keiingi urpaqqa dáripteý joldaryn tujyrymdaý bolyp tabylady.
Osyǵan qarai basqosýda pedagogika ǵylymdarynyń doktory, professor Shargúl Taýbaeva Akademiiamen birlesip tulǵataný aiasynda Ybyraitanýdyń tulǵalyq model jobasyn jasaǵandyǵyn jetkizdi.
Professordyń oiynsha, Ybyrai Altynsarinniń pedagogikalyq júiesiniń logikalyq-qurylymdyq modeli mynadai baǵyttardy quraidy: 1) Altynsariniń dúnietanymy; 2) Ádistemelik kózqarasy; 3) Zerttegen ǵalymdar; 4) Mekteptegi oqytý úderisi; 5) Oqytýda halyq poeziiasyn paidalaný; 6) Mektepti uiymdastyrýy; 7) Tárbielik murasy; 8) Psihologiialyq murasy; 9) Didaktikalyq murasy.
«XXI ǵasyrdaǵy mektep ustazdarynyń aldyndaǵy mindeti – egemendi elimizdiń jas urpaǵyn jan-jaqty damyta otyryp, imandylyqqa, ultjandylyqqa, otanshyldyqqa tárbieleý. Sondyqtan bul usynylǵan jobanyń tárbielik máni zor bolmaq»,- dep atap ótti ǵalym Sh. Taýbaeva.
Qoǵam qairatkeri Ó. Ozǵanbaev ár ulttyń aldymen óz qoinaýynan shyqqan tarihpen sýsyndaityndyǵyn, bizdiń osy kezge deiingi ilim-bilim tutastyǵyn Ybyraitaný muralary kele jatqandyǵyna kóńil aýdardy.
Bul rette Ó. Ozǵanbaev saiasi qýǵyn-súrgin boiynsha ulttyq komissiia qurylǵanyn atap óte otyra, HH ǵasyrdyń 30 jyldary repressiiaǵa ushyrap qurban bolǵan ult pedagogtary tulǵasyna kóńil aýdardy.
Ult ustazy Ybyrai Altynsarinniń 180 jyldyǵyn merekeleý aiasynda belgili ybyraitanýshy - ǵalym Jaqyp Qalqaman mektepterde jańa oqý jylyn «Kel, balalar, oqylyq!» taqyrybynda synyp saǵattarynan bastaýdy usyndy.
Óz kezeginde Akademiia ǵalymy Jaýmbai Qaraev «Ybyrai Altynsarin murasy eki ǵasyr boiy ultty tárbielep keletinin» atap ótti.
Aqyn, Halyqaralyq «Alash» ádebi syilyǵynyń laýreaty Ospanuly Serikbai zertteýi boiynsha halyq kóńilinde júrgen «Eńbek etseń - emersiń» maqaly Y. Altynsaringe tiisti ekendigin aitty.
Jiyn qorytyndysynda sarapshylar odan ári Ybyrai muralaryn álemdik deńgeige tanytýǵa basymdyq beretindigine ýaǵdalasty.
