Qazaqstandyq biznestiń 70 paiyzy memlekettik jáne kvazimemlekettik sektordaǵy tenderlerdiń arqasynda kún kórip otyr. Senat depýtaty Murat Baqtiiaruly osylai aitty, dep habarlaidy Baq.kz agenttigi.
«Qazir elimizde memlekettik jáne kvazimemlekettik sektorlardaǵy satyp alý jáne igerý salasynda ǵana biznes bar. Bul qazaqstandyq biznestiń 70 paiyzy tenderlerdiń arqasynda kún kóretinin, iaǵni memlekettiń moinynda masyl bolyp otyrǵanyn bildiredi. Ekonomikadaǵy memlekettik sektor úlesi tym úlken. Buny barlyǵy jaqsy túsinedi. Bundai jaǵdaida myqty kásipker shyqpaidy», - dedi Murat Baqtiiaruly Senat otyrysynda.
Senator osyǵan qatysty túsiniktemeni premer-ministrdiń orynbasary Erbolat Dosaevtan surady. Depýtat Prezidenttiń ekonomikadaǵy memleket úlesin azaitý týraly tapsyrmasyn eske saldy. Osy suraqqa jaýap bergen Dosaev depýtattardy «Úkimette startegiialyq jospar» bar dep sendirdi.
«2020 jylǵa deiin memlekettik sektor jáne kvazimemlekettik sektor boiynsha ekonomikadaǵy memleket úlesin 15 paiyzǵa deiin azaitý josparlanyp otyr. Biz 1 jeltoqsannan bastap biznesti qoldaýǵa 600 milliard teńge baǵyttaǵymyz keledi. Olardyń 300 milliard teńgesi ónerkásipke, 100 milliard teńgesi shaǵyn jáne orta biznesti damytýǵa jáne 200 milliard teńgesi aýyl sharýashylyǵyna arnalǵan. Barlyq qarjy bank nesieleri arqyly baǵyttalady», - dedi Erbolat Dosaev.
