Búgin Almaty oblysynyń Qapshaǵai garnizonynda BUU bitimgershilik missiiasyna qatysý úshin tórtinshi bitimgershilik rotasynyń áskeri qyzmetshilerin Livanǵa jóneltýdiń ekinshi kezeńi ótti, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Josparǵa sáikes rotatsiialyq tártippen 60 bitimgerden turatyn top «Livandaǵy BUU ýaqytsha kúshteri» missiiasynyń quramynda qyzmet ótkerý úshin jiberildi. Bul rotatsiianyń ereksheligi – bitimgershilik missiiasynyń tarihynda alǵash ret quramǵa Desanttyq-shabýyldaýshy áskerleriniń ǵana emes, sondai-aq óńirlik qolbasshylyqtardyń da áskeri qyzmetshileri engizildi.
Jalpy alǵanda, tórtinshi qazaqstandyq bitimgershilik rotasynyń quramyna 120 áskeri qyzmetshi kiredi. Epidemiologiialyq jaǵdaidy eskere otyryp, jeke quramnyń densaýlyǵyn saqtaý úshin áskeri qyzmetshilerdi jiberý eki kezeńge josparlanyp, tamyz aiynyń basynda jáne ortasynda ótkizý týraly sheshim qabyldandy.
Livanǵa kelgennen keiin qazaqstandyq áskeri qyzmetshiler 2019 jylǵy qarashadan bastap missiiadaǵy úshinshi bitimgershilik rotasyndaǵy áriptesterin almastyrady. Bitimgerler jergilikti jerdi patrýldeý jónindegi mindetterdi oryndap, azamattyq halyqqa kómek kórsetip, baqylaý beketterin uiymdastyryp, missiia shtabynyń basqa da is-sharalaryna qatysatyn bolady. Kún saiyn qazaqstandyq jáne úndi bitimgerleri birlesip 50-ge jýyq mindetterdi oryndaidy.
Barlyq áskeri qyzmetshiler bitimgershilik qyzmetke qatysty Birikken Ulttar Uiymynyń negizgi qujattarynyń rásimderi men normalaryna sáikes muqiiat iriktelip, oqytyldy. Tapsyrmalardy oryndaý úshin jeke quramdy daiyndaý toǵyz ai boiy Almaty oblysynyń N. Tilendiev oqý ortalyǵy bazasynda karantindik sharalardy qatań saqtai otyryp júrgizildi.
Esterińizge sala keteiik, Qazaqstannyń «Livandaǵy BUU ýaqytsha kúshteri» bitimgershilik missiiasyna qatysýy 2018 jyldyń qazan aiynda BUU mandatyna sáikes Livanda qazaqstandyq jáne úndi bitimgerlerin birlesip óristetý týraly memorandýmǵa qol qoiylǵannan keiin bastaldy.
