Elimizde áskeri bitimgerlerdi Donbasqa jiberý máselesi kóterilgen emes. Bul týraly Qorǵanys ministriniń orynbasary, general-leitenant Sultan Kamaletdinov málim etti, dep habarlaidy QazAqparat.
Búgin Ortalyq kommýnikatsiialar qyzmeti alańynda ótken baspasóz máslihaty barysynda tilshi «Eger ujymdyq qaýipsizdik shart týraly uiym (ODKB) Donbasqa áskeri bitimgerlerdi jiberý týraly sheshim qabyldasa, qazaqstandyq bitimgerler qatysa ma?», - degen saýal qoidy. Tilshi saýalyna Qorǵanys ministriniń orynbasary, general-leitenant Sultan Kamaletdinov jaýap berdi.
«Geosaiasi jaǵdaiǵa bailanysty atalǵan másele barsha qazaqstandyqtardy alańdatyp otyrǵan sekildi. Aita ketetin jait, qazaqstandyq Qarýly kúshterdiń elden tys jerdegi sharalarǵa qatysýy týraly aldyn ala jazylyp, normaǵa sai bekitilgen. Qarýly kúshterdiń bitimgerlik operatsiialarǵa qatysýy tek BUU Qaýipsizdik keńesiniń rezoliýtsiiasy boiynsha ǵana júzege asyrylady», - dedi Sultan Kamaletdinov.
Onyń aitýynsha, BUU rezoliýtsiia jariialaǵan jaǵdaidyń ózinde másele aldymen el ishinde talqyǵa salynady.
«Memleket basshysy rezoliýtsiiany negizge ala otyryp, máseleni Parlamenttiń aldyna shyǵarady. Eger Parlament bekitse, onda áskeri bitimgerlerdi qatystyrý sheshimi qabyldanýy múmkin. Degenmen, qazir Donbasqa áskeri bitimgerler jiberý máselesi qaralyp jatqan joq. Eshqandai kelisim nemese kelissóz de júrip jatqan joq», - deidi ol.
