Qazaqstan quramasynda óner kórsetetin aýyratlet Nijat Rahimov dopingke qarsy erejelerdi buzǵany úshin altyn medaldan aiyrylyp, segiz jylǵa sporttan shettetildi. Bul týraly sport tórelik sotynyń (CAS) resmi saity jazdy, - dep habarlaidy Tengrinews.kz tilshisi R-Sport basylymyna silteme jasap.
Nijat Rahimov 77 kelige deiingi salmaq dárejesinde 2016 jylǵy Rio Olimpiadasynda altyn alǵan. CAS málimetinshe, aýyr atlettiń 2016 jyldyń 15 naýryzynan 2021 jyldyń 18 qańtaryna deiin kórsetken barlyq nátijeleri joiylady.
2021 jyldyń qańtarynda halyqaralyq testileý agenttigi (ITA) sportshyny dopingke qarsy erejelerdi buzdy dep aiyptady.
Sot tóreshisi qazaqstandyq aýyr atletti záriniń tórt úlgisin almastyrǵany úshin kináli dep tanydy. Bul Halyqaralyq aýyr atletika federatsiiasynyń (IWF) dopingke qarsy erejelerin buzý bolyp sanalady.
Nidjat Rahimov 1993 jyly 13 tamyzda Bakýde dúniege kelgen. Ol - etnikalyq ázirbaijan. 2010 jyly Ázirbaijan quramasy sapynda Singapýrda ótken jazǵy Jasóspirimder Olimpiadasynyń jeńimpazy atandy. 2013 jyly Perýde ótken jasóspirimder arasyndaǵy álem chempionatynda ekinshi oryn aldy. Sol jyly doping qoldanǵany úshin eki jylǵa shettetildi.
2014 jyldyń tamyzynda Rahimov Qazaqstan azamattyǵyn qabyldap, Qazaqstan quramasy sapynda óner kórsetýge sheshim qabyldady.
