Foto: Gov.kz
Qazaqstandyq opera ánshisi Áigerim Altynbek Italiiada ótip jatqan XI Halyqaralyq CLIP (Concorso Lirico Internazionale di Portofino) opera ánshilerine arnalǵan baiqaýdyń finalyna shyqty, dep habarlaidy Ult.kz.
22–27 shilde aralyǵynda Portofino qalasynda uiymdastyrylǵan bul baiqaý – 32 jasqa deiingi oryndaýshylar úshin álemdegi eń bedeldi mýzykalyq dodalardyń biri.
Áigerim álemniń 50-ge jýyq elinen kelgen 92 úmitkerdiń arasynan sýyrylyp shyǵyp, finalǵa joldama aldy. Baiqaý birneshe kezeńnen turady: aldymen qatysýshylar aldyn ala tyńdaýdan ótedi, keiin orkestrdiń súiemeldeýimen Portofinonyń ortalyq alańy – Piazzetta di Portofino-da óner kórsetedi. Final saltanatty gala-kontsertpen qorytyndylanady.
Qazylar alqasynyń quramynda «La Scala» (Milan), Opera de Monte-Karlo, Kolon teatry (Býenos-Aires), Madridtegi Korol teatry men Visbaden memlekettik teatry siiaqty áigili óner oshaqtarynyń jetekshileri bar.
Áigerim Altynbek buǵan deiin de halyqaralyq deńgeidegi birqatar jetistikterimen tanylǵan. Ol Italiiada ótken Nikolai Giaýrov atyndaǵy baiqaýda úshinshi oryn ielenip, ataqty opera ánshisi Mirella Freni atyndaǵy arnaiy marapatqa ie boldy. Sonymen qatar, Milannyń áigili «La Skala» teatrynyń jastar baǵdarlamasyna qabyldanyp, aldaǵy eki jyl boiy osy teatrda bilim alady. Maýsym aiynda ol opera óneriniń ańyzdary Hose Karreras pen Andrea Bochellimen birge bir sahnada án shyrqady.
