Foto: pixabay.com
Qazaqstandyq alaiaqtar aldaýdyń jańa jolyn tapty. Bul týraly Stopfake habarlady.
Jańa tásil boiynsha, alaiaqtar adamdarǵa salyq qaryzdaryn tóleýdi talap etetin habarlamalar jiberedi eken.
"Saq bolyńyz jáne esten shyǵarmańyzdar: eger bireýler qashyqtan tólem jasaýdy usynsa, barlyǵyn muqiiat tekserip alyńyz, bul alaiaqtardan aqshany qaitarýdy talap etýden góri ońai", - deidi jýrnalister.
Bul shema qalai júzege asyrylady?
Feik "salyq habarlamalary" yqtimal jábirlenýshiniń elektrondyq poshtasyna keledi. Onda "qaryzdy" qysqa merzimde óteý talap etiledi. Sondai-aq, tólem jasaýǵa bolatyn tikelei silteme usynylady. Al ol boiynsha ótken adamdar aqshany birden alaiaqtarǵa aýdarady.
Salyq habarlamalary elektrondyq poshta arqyly jiberilmeitinin umytpaǵan jón. Memlekettik kirister komitetiniń saityndaǵy resmi aqparatqa sáikes habarlamalardy poshta arqyly tapsyrysty hatpen, arnaiy mobildi nemese veb-qosymsha ne bolmasa "Azamattarǵa arnalǵan úkimet" memlekettik korporatsiiasynyń servisteri arqyly jiberýge bolady.
"Belgisiz bireýlerden kelip túsken elektrondyq hattardy ashpańyz. Mundai habarlamalardy oqymai birden óshirgen durys. Al eger ony ashyp qoisańyz, onda tirkelgen siltemeler boiynsha ótpeńiz jáne faildardy júktemeńiz. Olar alaiaqtyq saittarǵa aparýy nemese ziian baǵdarlamalardy qamtýy múmkin", - deidi jýrnalister.
Naqty qaryzdyń bar-joǵyn qalai tekserýge bolady?
Tólenbegen salyqtar men aiyppuldardyń bar-joǵyn Kaspi.kz, Halyk Bank jáne E-Salyq Azamat servisteri arqyly bilýge bolady:
- Kaspi.kz - "Barlyq tólemder" → "Aiyppuldar men salyqtar" → "Salyqtar" - "Salyqtar boiynsha qaryzdar" → "Tekserý";
- Halyk Bank "Barlyq tólemder" - "Salyqtar, aiyppuldar, HQKO qyzmetteri" → "Salyqtar" → "Salyq bereshegin tóleý (kólik, jer jáne múlik)" "Tekserý";
- e-Salyq Azamat "Elektrondyq servister" "Salyq jáne áleýmettik tólemder boiynsha bereshek servisi" → "JSN engizý" → "Tabý".
Kiberqylmyskerlerdiń "salyq habarlamalary" týraly alǵash ret 2023 jyldyń sońynda belgili boldy. Bul shema týraly QR Qarjy ministrliginiń Memlekettik kirister komiteti habarlady. Sodan beri Qaznette aldaýdyń bul túrine tap bolǵan jandar týraly talai ret jazyldy.
