Saýda jáne integratsiia ministri Baqyt Sultanov otandyq eksportshylarǵa qandai kómek kórsetilgenin aityp berdi, dep habarlaidy QazAqparat.
«Ókinishke qarai, búgingi tańda tek 400 qazaqstandyq kompaniia turaqty túrde shetelge ónimin eksporttap otyr. Bul belsendi kásiporyndardyń (elde óńdeý ónerkásibi salasynda 15 803 kásiporyn bar) bar-joǵy 2,5 paiyzy ǵana. Jahandyq saýda alańynda qazaqstandyq shikizattyq emes taýarlardyń eksporty baiaǵysha tómen deńgeide», - dedi Baqyt Sultanov ministrliktiń keńeitilgen otyrysynda.
Ministrdiń sózine sensek, qazirgi tańda memleket eksportqa shyqqysy kelgen kásiporyndarǵa barynsha qoldaý bildirip keledi. AQSh pen Qytai arasyndaǵy saýda-ekonomkikalyq teketires pen ózge elderdiń sanktsiialyq daýy qazaqstandyq eksporttyń odan ary tómendep ketpeýine az bolsyn septigin tigizýde.
«2019 jyly 92 eksporter kásiporyn quny 139,9 mlrd teńgelik jeńildetilgen nesiemen qamtylsa, taǵy 74 eksporter 90 mlrd teńgelik saqtandyrý boiynsha qoldaýǵa ie boldy. Taǵy 3 mlrd teńge servistik qoldaýǵa jumsaldy. Osynyń arqasynda 139 eksportqa beiim kásiporyn óziniń kóliktik shyǵynyn 4 mlrd teńgege azaitýǵa múmkindik aldy. Temirjol, avia jáne avtotasymaldyń kómegimen qazaqstandyq ónim Resei, Ózbekstan, Aýǵanstan, Tájikstan men Qytaiǵa ótkizildi», - dedi ol.
