«Jahandaǵy zamanaýi qazaqstandyq mádeniet» jobasy aiasynda BUU-nyń 6 tiline aýdarylǵan qazirgi qazaq ádebieti antologiiasynyń alǵashqy kitaby basylyp shyqty. Bul kitaptar Almatyda Dostyq úiinde tanystyryldy, dep habarlaidy QazAqparat tilshisi.
Poeziia jáne proza jinaqtarynyń tanystyrylymyna osy jobaǵa qatysqan Ulybritaniia, Ispaniia, Frantsiia, Resei, Qytai jáne Egipet aýdarmashylary men ádebietshileri, aýdarma jáne baspa uiymdarynyń basshylary, shyǵarmalary qazirgi qazaq ádebieti antologiiasyna engen avtorlar qatysty.
QR Prezidenti ákimshiligi Ishki saiasat bóliminiń meńgerýshisi, «Jahandaǵy zamanaýi qazaqstandyq mádeniet» jobasyn iske asyrýǵa jaýapty jumys tobynyń jetekshisi Aida Balaeva qazaq ádebietiniń úzdik úlgilerin BUU-nyń 6 tiline aýdaryp, taratý - ult tarihyndy buryn-sońdy bolmaǵan, qazaq mádenietin álemge tanystyrý turǵysynan teńdesi joq bastama ekenin aitty.
«12 sáýirde «Rýhani jańǵyrý» baǵdarlamasynyń bastalǵanyna eki jyl toldy. Osy eki jyl ishinde Elbasy naqtylaǵan 6 joba boiynsha qyrýar jumys atqaryldy. Basty maqsat - qazaq mádenietin shetelge tanystyrý. Onyń ishinde ádebiettiń orny bólek. Ádebiet - ónerdiń shyńy, mádeniettiń qazyǵy. Sondyqtan ár halyqtyń negizgi bolmysyn, dúnietanymyn ádebiet arqyly tanýǵa bolady. Eki jyl ishinde bizde táýelsizdik kezeńinde bolmaǵan úlken qadam jasaldy. Ulttyq mádenietimizdiń bar jetistigin álemdik mádeniettiń altyn qoryna qosýdyń alǵashqy qadamy ádebietten bastalyp otyr. Qazaq ádebietiniń eń ozyq týyndylaryn BUU 6 tilinde sóiletýge óris ashyldy. Qazaq aqyn jazýshylarynyń 2 tomdyq antologiiasy aǵylshyn, orys, arab, ispan, frantsýz, qytai tilderine aýdaryldy», - dedi Aida Balaeva.
Onyń aitýynsha, 60 qazaqstandyq avtordyń tańdamaly shyǵarmalary bir mezette álemniń eń iri 6 tiline aýdarylyp, sol tilderde jumys isteitin eń bedeldi baspalardan shyǵyp, 5 qurlyqtaǵy 90-nan asa eldiń joǵary oqý oryndary, kitaphanalary men ǵylymi ortalyqtaryna jetedi.
Jalpy sany 2 milliard 600 million halyq qazirgi qazaq ádebietiniń jaýharlarymen tanysýǵa múmkindik alady.
Sondai-aq, jiynda «Rýhani jańǵyrý» baǵdarlamasyn júzege asyrý jónindegi Ulttyq komissiia músheleri, Qazaqstan Respýblikasy Mádeniet jáne sport ministrliginiń ókilderi, Qazaqstan Jazýshylar odaǵy men «Ulttyq aýdarma biýrosy» qoǵamdyq qorynyń ókilderi boldy.
Aita keteiik, «Jahandaǵy zamanaýi qazaqstandyq mádeniet» jobasy aiasynda qazirgi qazaq ádebietiniń antologiialaryn BUU-nyń 6 tiline aýdarý jumysy qolǵa alynǵan bolatyn.
Antologiianyń aǵylshyn tilindegi nusqasyn Ulybritaniianyń Kembridj ýniversitetiniń baspasy ázirledi. Antologiianyń ispan tilindegi nuqasyn shyǵarýdy osy eldiń mádeniet ministrligi qoldady. Áigili Servantes institýty keńesshi retinde tartylyp otyr.
Al 40 jyldyq tarihy bar «Vizor» baspa úii antologiiany basyp, Ispaniianyń ózinde jáne Latyn Amerikasynda ispan tilinde sóileitin 20 shaqty elge taratady.
Frantsiiada Parij qalasynyń meriiasynyń nusqaýymen Frantsiianyń ulttyq kitap ortalyǵy jáne Parijdegi baspa úii aýdarma jumysyn uiymdastyryp, Qazaq ádebietiniń antologiiasyn Frantsiia, Shveitsariia, Belgiia jáne frantsýz tilinde sóileitin taǵy 30 shaqty elge taratady.
Mihail Lomonosov atyndaǵy Máskeý memlekettik ýniversiteti orys tilindegi nusqany ázirlese, Qytai Halyq Respýblikasynyń Ulttar baspasy eki jinaqtyń qytai tilindegi nusqalaryn daiarlaidy.
Al arab tilindegi nusqany daiarlaý mindetin Mysyr Arab Respýblikasynyń mádeniet jáne bilim ortalyǵy óz moinyna alyp otyr.
Bul joba Qazaqstan Respýblikasy Tuńǵysh Prezidenti - Elbasy Nursultan Nazarbaevtyń bastamasymen júzege asyp jatqan «Rýhani jańǵyrý» baǵdarlamasy baǵyttarynyń biri. Ol táýelsizdik jyldaryndaǵy qazaq ádebieti men mádenieti, mýzykasy men beineleý ónerin, horeografiia, kino jáne teatr salasyndaǵy jetistikterin álemge tanytýdy maqsat etedi. Joǵaryda atalǵan seriktes-uiymdar aýdarma, basyp shyǵarý, taratý-nasihattaý jumystaryna jalpy sany 70-ten asa mamandy jumyldyrdy.
Joba QR Mádeniet jáne sport ministrliginiń tapsyrysy boiynsha «Ulttyq aýdarma biýrosy» qoǵamdyq qorynyń úilestirýimen júzege asýda.
