Oqý-aǵartý ministri Ashat Aimaǵambetov halyqaralyq olimpiada júldegeri bolǵan oqýshylardy marapattady, dep habarlaidy "Ult aqparat".
"Biyl daryndy balalarymyz 27 medal jeńip alyp, ótken jyldardaǵy rekordtaryn jańartty. Quttyqtaýdyń ózi de balalar, olardyń ata-analary men muǵalimder úshin erekshe qýanyshty boldy.
Prezident Qasym-Jomart Kemeluly Toqaevtyń qoldaýynyń arqasynda 27 jeńimpazǵa 4,7 mln teńgege deiingi sertifikattar tabystadyq. Bul Memleket basshysynyń daryndy balalardy yntalandyrý jumystaryn júrgizý boiynsha tapsyrmasynan keiin múmkin boldy. Sondai-aq oqýshylar UBT tapsyrmai-aq qazaqstandyq JOO-da oqýǵa granttar aldy" - dep jazdy ol Facebook-taǵy paraqshasynda.
Ministrdiń aitýynsha, bul baǵyttaǵy jumystar áli de jalǵasyn tappaq.
"Biyl tizimge 7 halyqaralyq olimpiada kirse, kelesi jyly ol taǵy 7 bedeldi halyqaralyq olimpiadamen tolyǵady. Biz elimizdegi barlyq deńgeidegi olimpiadany ótkizýdiń ashyqtyǵyna erekshe nazar aýdarýdy jalǵastyra beremiz.
Sondai-aq júldeli oryn alǵan oqýshylardy daiyndaǵan ustazdar da birjolǵy aqshalai tólem alady. Daryndy balalardyń ata-analaryna da alǵys hattar tabystadym.
El Prezidentiniń jáne memlekettiń tikelei qoldaýy basqa da oqýshylarymyzdyń olimpiadaǵa qyzyǵýshylyǵyn arttyratynyna senimim mol. Halyqaralyq arenada el namysyn laiyqty qorǵaǵan barlyq jeńimpazǵa taǵy da alǵys aitamyn. Boilaryńyzdaǵy tabandylyq, qajyrly eńbek, bilimge degen qushtarlyq qasietterińiz sizderdi jańa jeńis pen tabysqa jetelei bersin!" - dedi Aimaǵambetov.
