Qazaqstandyq 14 boksshy jartylai finalǵa shyqty

Ammanda ótip jatqan bokstan erler men áielder arasyndaǵy Aziia chempionatynyń jartylai finalyna shyqqan boksshylardyń esimi belgili boldy. Jeksenbi kúngi básekelerdiń qorytyndysy boiynsha, Qazaqstan quramasynyń 14 boksshysy sol mejeden kórindi. Sondai-aq dúisenbi kúni taǵy jeti bylǵary qolǵap sheberimiz shirek final kezdesýlerin ótkizdi.

Altynshy jarys kúniniń kúndizgi sessiiasynda Qazaqstan boksshylarynan birinshi bolyp 54 kilo salmaq dáre­jesindegi otandasymyz Mahmud Sabyrhan sharshy alańǵa kóterildi. Byl­tyrǵy álem chempionatyndaǵy tabysty ónerinen keiin jankúierlerdiń kóz­aiymyna ainalǵan Mahmud Sary qurlyq birinshiligindegi alǵashqy ai­qa­­­syn mońǵoliialyq Dornyambýý Gan­bold­pen ótkizip, 5:0 esebimen jeńiske jetti. Bir jekpe-jek arqyly jartylai finalǵa shyqqan ol kem degende qurlyq bá­sekesiniń qola júldesin ielenedi. De­genmen altynnan úmitti boksshymyz finalǵa shyǵý úshin 10 qarashada ózbekstandyq Shahzod Mýzafarovpen kezdesedi.

Sabyrhannyń izin ala ringke 57 kilo salmaqtaǵy Serik Temirjanov shyǵyp, ol da jartylai finalǵa joldama aldy. Jergilikti boksshy Iýsef Iashashpen qolǵap túiistirgen otandasymyz tóreshilerdiń biraýyz sheshimimen basym tústi. Endi jartylai finalda ol úndistandyq boksshymen kezdesedi.

Sondai-aq 60 kilodaǵy Samatáli Tóltaev ta Aziia birinshiligindegi alǵashqy jekpe-jegin sátti ótkizip, qyrǵyzstandyq Mirzohid Imamnazarovtan tóreshilerdiń aralas sheshimimen ailasyn asyrdy. Jastar arasyndaǵy Aziia chempiony Samatáli final joldamasyn jergilikti boksshymen sarapqa salady.

Keshki sessiiada baq synaǵan jeńil salmaqtaǵy Sanjar Táshkenbai shirek finalda qyrǵyzstandyq Mirlan Týrkbaiulyn tize búktirdi. 1/8 finalda ózbek boksshysyn jarys jolynan yǵystyrǵan Sanjarǵa qyrǵyz boksshysy da qarsylyq kórsete alǵan joq. Otan­dasymyz endi jartylai finalda úndis­tandyq bylǵary qolǵap sheberimen ju­dy­ryqtasady.

Erler arasynda sońǵy bolyp sharshy alańǵa el chempiony Dýlat Bekbaýov (67 kilo) shyqty. Alǵashqy aiqasyn sátti ótkizgen otandasymyz shirek finalda taǵy bir qyrǵyzstandyq Jakshylyk Talaibekovten ailasyn asyrdy. Dýlat finalǵa shyǵý úshin birneshe halyqaralyq týrnirdiń jeńimpazy ózbekstandyq Asadhodja Mýidinhodjaevpen jekpe-jek ótkizedi.

Jeksenbi kúngi jarys kúninde baq synaǵan qyzdarymyzdan tek Alýa Balqybekova (48 kilo) ǵana jartylai finalǵa joldama aldy. Byltyrǵy Aziia chempionatynda top jarǵan otandasymyz shirek finalda Tailand ókili Thipsatchei Iodvaridi tóreshilerdiń biraýyz sheshi­mi­men qapy qaldyrdy.

Ókinishke qarai, byltyrǵy boksshylar dodasynda altynnan alqa taqqan 60 kilodaǵy Rimma Volosenko shirek finalda mońǵoliialyq qarsylasyn eki ret nokdaýnǵa túsirse de, tóreshiler mońǵol qyzy Nomin-Erdene Týgsjargaldyń qolyn kóterdi. Sóitip, Volosenko byl­tyr­ǵy Aziia chempiony ataǵyn saqtai almady.

Onyń aldyndaǵy kúni 51 kelide synǵa túsken túrkistandyq Sáken Bibosynov  ekinshi kezdesýinde malaiziialyq Kaiým Ariffindi tize búktirgen edi.

Osylaisha, shirek final jekpe-jekterinen keiin 14 boksshymyz jartylai finalǵa joldama jeńip aldy. Atap aitqanda, Sanjar Táshkenbai (48 kilo), Sáken Bibosynov (51 kilo), Mahmud Sabyrhan (54 kilo), Serik Temirjanov (57 kilo), Samatáli Tóltaev (60 kilo), Dýlat Bekbaýov (67 kilo), Alýa Balqybekova (48 kilo), Jazira Oraqbaeva (52 kilo), Jaina Shekerbekova (54 kilo), Karina Ibragimova (57 kilo), Mádina Nurshaeva (66 kilo), Dariǵa Shákimova (70 kilo), Gúlsaia Erjan (81 kilo) jáne Lázzat Kúngeibaeva (+78 kilo) jartylai finalda aiqasatyn boldy.

Sondai-aq keshe Aslanbek Shym­ber­ge­nov (71 kilo) úndistandyq Sachin­men, Nurqanat Raiys (75 kilo) qyrǵyzstandyq Sagyn Satybaldyulymen, Nurbek Oralbai (80 kilo) tailandtyq Virapon Chondjohomen, Saǵyndyq Toǵambai (86 kilo) tájikstandyq Navrýz Djafoevpen, Aibek Oralbai (92 kilo) úndistandyq Navin Kýmarmen, Qamshybek Qońqabaev koreialyq Do Hen Kimmen jáne Nazym Qyzaibai (50 kilo) mońǵoliialyq Balsan Mýngýnsaranmen kúsh synasty.