Qazaqstannyń avtomobil parki eskirip barady. El aýmaǵynda júrgen kólikterdiń 60 paiyzdan astamy 10 jyl buryn shyǵarylǵan, dep habarlaidy "Ult aqparat" Ranking.kz portalyna silteme jasap.
2019 jyldyń shilde aiynyń sońynda tirkelgen jeńil avtokólikterdiń sany 3,7 millionǵa jýyqtady. Halyqta 3,5 mln jeńil kólik bar. El minip júrgen jeńil kólik sanynyń jyldyq ósimi 4 óńirde ǵana tirkelgen. Atap aitqanda, Nur-Sultan qalasynda - 2,6 paiyzǵa artyp, 265 myń, Almaty oblysynda - 1,2 paiyz kóbeiip, 489,3 myń, Jambyl jáne Qyzylorda oblystarynda - 0,1 paiyzǵa ulǵaiyp, tiisinshe 196,5 myń jáne 112,7 myń kólikti qurady. Diplomatiialyq nómiri bar avtomobilderdiń sany da 17,7 paiyzǵa artyp, 29,1 myńǵa jetip otyr.
«3 jyldan bastap 7 jylǵa deiingi aralyqta shyǵarylǵan kólikterdiń sany da 18,2 paiyzǵa artty. Olardyń jalpy úlesi 12,6-dan 15,7 paiyzǵa jetip otyr. Barlyq tirkelgen avtomobilderdiń úshten ekisine jýyǵy - 10 jyldan astam ýaqyt buryn shyǵarylǵan kólikter. Olardyń sany bir jylda 2,9 paiyzǵa kemigenimen, jalpy úlesi 63-ten 64,8 paiyzǵa deiin kóbeigen. Shyǵarylǵanyna 3 jyl tolmaǵan kólikterdiń sany 25,9 paiyzǵa qysqarǵan», - delingen taratylǵan aqparatta.
Eski kólikter sanynyń artýyna ekinshi deńgeili bankterdiń shyqqanyna 10 jyldan asyp ketken avtomobilderdi satyp alýǵa nesie berýi sebep bolyp otyr. Al osydan birneshe jyl buryn bankter zaýyttan shyqqanyna 7 jyldan aspaǵan kólikterdi ǵana satyp alýǵa nesie beretin edi.
