Týǵan jeri Shamalǵanǵa saparlap kelgen QR Tuńǵysh Prezidenti Nursultan Nazarbaev óz jerlesterimen kezdesti, dep habarlaidy QazAqparat tilshisi.
Jurtshylyq Elbasyny úlken syi-qurmetpen qarsy aldy. Kezdesýde Nursultan Ábishuly óziniń osy uiadan ushqan sátin eske aldy.
«1958 jyly osy Shamalǵannan shetke ketip 20 jyldan soń Almatyǵa qaityp keldim. Kishkentaiymnan osy jerde óstim. Ata-babamyz Qarataýdyń baýraiynda aǵaiyn-týǵan, quda-jekjat barlyǵy osy Shamalǵanda. Jastar áli bile bermeidi. Ýaqyt kelgende aýylyńa kelgende jastyq shaq eske túsedi. Memleketti aiaǵynan nyq turǵyzý úshin qansha qiyn-qystaý ýaqyttardan óttim. Taýda, sai-sailarda ákemmen júrgenim eske túsken kezde barlyq sharshaǵanym umytylǵandai bolady. Sondyqtan adamnyń kindik kesken jeri ystyq. Adam týǵan jerin súiý arqyly úlken Otanyn súiip patriot bolady», - dedi Nursultan Nazarbaev.
Óz sózinde ol týǵan jerine qurmetin jetkize kele el basqarǵan kezdegi estelikterimen bólisti.
«Men de sizder siiaqty osy jerden ósip, álemniń 170 elin araladym. 200-den astam prezidentpen kezdestim. Sonyń barlyǵy eldiń qamy úshin bolatyn. 1979 jyly Ortalyq Komitet hatshysy bolyp kelgennen beri qarai 40 jyl el basqarý isterinde jumys istedim. Qolymnan kelgenshe kúndiz-túni jumys jasap, qazaq elin álemge tanytýǵa tyrystym. Sonyń arqasynda eshkim bilmeitin Qazaqstan dúniejúzine belgili boldy. Qazaqstandyqtardyń barmaityn jeri, demalmaityn kýrorty joq. Balalary álemdik JOO-da bilim alyp jatyr, densaýlyǵyn túzeimin dese de sheteldik emhanalarǵa barýda. Sonyń barlyǵy eldiń órkendeýi, memleket dárejesiniń kóterilýi arqasynda. Qazaqstan basqalarmen salystyrǵanda úlken el emes. Bizdiń el Qytai men Resei siiaqty alyp memlekettermen shektesedi. Ońtústigimizde Islam memleketteri. Olardyń arasynda 18 mln halyqpen, jerimiz keń bolsa da úlken dep aita almaimyz. Durys júrgizilgen saiasattyń arqasynda barlyq memleketter Qazaqstandy syilaityn boldy. Araaǵaiyndyq tatýlyq máselesine kiristik. Arqa tósinde jańa elordamyzdy saldyq. Elordamyz álemdik jiyndar ótetin, tanymal ortalyqqa ainaldy. Qazaqstannyń ortalyǵy qandai bolsa, eli de sondai dep túsinedi», - dedi Tuńǵysh Prezident.
Sondai-aq Elbasy prezidenttik ókilettigin nelikten toqtatqanyn túsindirip, eldiń áleýmettik jaǵdaiy týraly pikir bildirdi.
«Ózderińiz bilesizder jaqynda men sheshim qabyldap, prezidenttik ókilettigimdi toqtattym. Sebebi, ár urpaqtyń óziniń ýaqyty, isteitin jumysy bar. Biraq men Elbasy retinde biliktiń eń joǵarǵy satysyna kelip, odan ári ne istep jatqanyn kórip, strategiialyq máselelerge kóńil bólý úshin osylai sheshtim. Meniń ornyma kelgen Toqaev myrza belgili qazaq azamaty, meniń úmitimdi aqtaidy dep senemin...
...Qazaqstannyń bolashaǵy zor. Elde jastarǵa oqý oqýǵa, til úirenýge tolyq jaǵdai jasalýda. Bolashaǵymyz bilim-ǵylymda jatyr. Sizder aýyldyń adamdarysyzdar. Aýyl úshin talai baǵdarlama jasalyp, jumystar júrýde. Aýyl turǵyndaryna shaǵyn nesieler berilip, jumys isteimin degenderge, mamandyǵy joqtarǵa zamanǵa sai mamandyq igerýge múmkindik berilgen. Qazir másele jumysyzdyqta emes, mamandyqty durys igermeýde. Mamany bar adam jumysty kez kelgen jerden taba alady», - dedi ol.
Aita keteiik, Naýryz aiynyń sońynda Nursultan Nazarbaev Almatyǵa saparlap kelgen bolatyn.
.jpeg)