Respýblikalyq mańyzy bar avtojoldardyń qaýipsizdigi men jaiylyp júrgen maldyń jolǵa shyǵyp ketpeýi úshin arnaiy sharalar qolǵa alyndy, dep habarlaidy QR Indýstriia jáne infraqurylymdyq damý ministrliginiń resmi saity.
Saittaǵy derekterge qaraǵanda, eldegi tasjoldardyń boiyna janýarlardy úrkitetin ýltradybystyq qurylǵylar men «elektrli baqtashy» qorshaýlary ornatyldy.
Bul jumystar eń aldymen, Mańǵystaý oblysynda bastalǵan. Onda «Qazaqavtodor» jaýapkershiligi shekteýli seriktestiginiń filialy arnaiy qorshaýlar ornatqan. Kerneýi 12 volt bolatyn 3000 metrlik «elektrli baqtashy» «Dossor - Kulsary - Beĭneý - Saĭ - Ótes - Shetpe - Jetibaĭ - Aqtaý t.p.» avtojolynyń 723-726 shaqyrymyndaǵy ýchaskesiniń boiyna qoiylǵan.
«Elimizde maldyń jolǵa shyǵyp ketýinen bolatyn kólik apattary jiilep ketti. Mysaly, tek biylǵy jyldyń alǵashqy jartyjyldyǵynda janýarlardy basý sebebinen 16 jol kólik oqiǵasy tirkelgen. Nátijesinde 33 adam jaraqat alyp, ekeýi mert boldy. Byltyr osyǵan sáikes kezeńde 23 jol kólik apaty boldy. Onda 29 adam zardap shegip, jeteýi kóz jumdy.
Jol kólik oqiǵalarynynyń artýyna respýblikalyq joldardyń boiyndaǵy torly qorshaýlardyń urlanýy da sebep bolyp otyr. Jaǵdai, ásirese túnde qiyndai túsedi. Qarańǵyda túk kórinbei ketedi. Onyń ústine, janýarlarǵa jaryq shaǵylystyratyn lentalar taǵylmaidy. Sol sebepten jol qyzmetkerleri maldy joldan qaýipsiz qashyqtyqqa qýýǵa májbúr bolady. Bul máseleni «elektrli baqtashylar» jobasy sheshedi. Zamanaýi qorshaýlar elimizdiń ózge óńirlerinde de ornatylatyn bolady»,-delingen habarlamada.
