Qazaqstandaǵy sý qoimalarynyń ielerine biryńǵai talap bekitiledi. Bul týraly Parlament Senatynyń otyrysynda Halyqaralyq qatynastar, qorǵanys jáne qaýipsizdik komitetiniń múshesi Qairat Qojamjarov málim etti, – dep habarlaidy «Ult aqparat».
«Qazaqstandaǵy sý qoimalarynyń 40 paiyzy eskirip ketken. Olardyń 82 paiyzynyń paidalanyla bastaǵanyna 40 jyldan asqan. Tutastai alǵanda barlyǵy apattyq sý jiberý júiesine muqtaj. Qazirgi tańda sý qoimalarynyń ieleri investitsiia salmastan, barlyq paidany óz qaltalaryna salady. Al tótenshe jaǵdailarǵa ainalyp kelgende memleket jaýapty bolyp otyr. Qyzylaǵashtaǵy oqiǵa báriniń esinde bolar» dedi Qairat Qojamjarov.
Osy sebepti senator sý qoimalarynyń aýqymyna qaramastan, ony kútip ustaýdyń biryńǵai talabyn bekitý kerek dep esepteidi.
«Sonymen birge, sý nysandarynyń esebi boiynsha jaýapty organnyń quzyretin bekitken durys. Sebebi, Qazaqstanda sý qoimalarynyń sany, tehnikalyq jai-kúii men qaida ornalasqany týraly naqty tolyqqandy baza joq. Tiisti zań jobasy qazirgi tańda Senatta qaralýda» dedi ol.
Eske sala ketsek, buǵan deiin Qairat Qojamjarov álemde 68 memleket sý defitsitin bastan keshirip otyrǵanyn, sonyń ishinde Qazaqstan da baryn atap ótken edi.
