Osy jyldyń tamyz aiynyń sońyna deiin elimizdegi statsionarlarda qosymsha 10 myń tósek-oryn daiarlanady. Bul týraly OKQ-da ótken baspasóz máslihatynda Densaýlyq saqtaý ministri Aleksei Tsoi málim etti, – dep habarlaidy "Ult aqparat".
«Bul virýstyń bir ereksheligi – patsientter kóbine statsionarlyq em-domǵa jáne tynys alýdy jasandy túrde qoldaýǵa muqtaj. Qazirgi tańda eldegi statsionarlyq tósek-oryndardyń tolymdylyǵy - 60 paiyz. Nur-Sultan men Almaty qalalarynda bul kórsetkish – 90 paiyz. COVID-19 patsientterin emdeý úshin 348 meditsinalyq uiymda 26 myń tósek-oryn ázirlendi», - dedi Aleksei Tsoi.
Ministrdiń habarlaýynsha, tamyz aiynyń sońyna deiin statsionarlarda 10 myń tósek-oryn daiarlanady. Ol statsionarlardyń qurylymynda jan saqtaý bólimsheleri men intensivti terapiia palatalary ashylyp, ókpeni jasandy jeldetý apparattary qoiylady.
«Ókpeni jasandy jeldetý apparattarynyń jalpy sany – 3 294. Keiingi aida 978 apparat satyp alyndy. Oǵan qosymsha osy apparattyń 1 myńyn satyp alý kózdelýde», - dedi ol.
Eske sala ketsek, Úkimet 2 kúnniń ishinde osy jyldyń naýryz-mamyr aiyndaǵydai qatań karantin sharalaryn engizý boiynsha usynys ázirleýi tiis. Bul tapsyrmany koronavirýs indetiniń taralýyna qarsy sharalar qabyldaý jónindegi keńes barysynda QR Prezidenti Qasym-Jomart Toqaev bergen edi. Óz tarapynan Densaýlyq saqtaý ministri qatań karantin boiynsha túpkilikti sheshim jaqynda qabyldanatynyn habarlaǵan bolatyn.
