Kúzdiń basynda Qazaqstanda sheteldik úlestiń qatysy bar jumys istep turǵan kompaniialar sany 21,7 myńǵa jetti. Bul ótken jyldyń dál osyndai kórsetkishinen 11,8 paiyzǵa kóp, dep habarlaidy "Ult aqparat".
Ranking.kz málimetinshe, onyń 97,3 paiyzy nemese 21,1 myńy - shaǵyn, 1,5 paiyzy (325) - orta jáne 1,2 paiyzy (260) - iri kompaniia sanalady. Sheteldik kompaniialardyń 8,6 myńy kóterme jáne bólshek saýda salasynda jumys isteidi. Qurylys salasynda 2,2 myń, kásibi, ǵylymi jáne tehnikalyq qyzmet salasynda 1,6 myń kompaniia bar.
Qazaqstandaǵy sheteldik kompaniialardyń eń kóbi - reseilik. Aitalyq, osy jyldyń tamyz aiyn sońynda Qazaqstanda Reseidiń 7 040 kompaniiasy jumys istep turdy. Olardyń basym bóligi (3 061 kompaniia) saýda salasynda qyzmet kórsetedi.
Elimizde Túrkiiadan kelgen kásiporyndar da az emes. Onyń sany - 2 044. Túrik kompaniialary negizinen saýda, qurylys, óńdeý ónerkásibi salalarynda qyzmet kórsetedi. Aita keterligi, qonaq úi men tamaqtaný boiynsha qyzmet kórsetý salasynda túrik kompaniialarynyń sany (172 kásiporyn) basym.
Qazaqstanda tirkelgen sheteldik kompaniiasy bar eldiń qatarynda Qytai da bar. Bul elden 1 020 shaǵyn, 16 orta jáne 20 iri kompaniia jumys isteidi.
