Foto: Aqorda
Premer-ministrdiń orynbasary Tamara Dúisenova elimizdegi mobildi aýdarymdardy baqylaýǵa qatysty suraqqa jaýap berdi. Onyń aitýynsha, qarjy ministrligimen áli talqylaý jumystary júrgizilip jatyr, dep habarlaidy Ult.kz Stan.kz-ke silteme jasap.
Úkimet otyrysynan keiin ótken baspasóz konferentsiiasynda vitse-premerge zańsyz kásipkerlikpen tirkeýsiz ainalysqany úshin salynatyn aiyppuldar jaily suraq qoiyldy. Ásirese, 255 myń teńgeden asatyn mobildi aýdarymdardy baqylaý týraly norma qabyldanǵan jaǵdaida ne bolady dep suraq qoidy.
"Bul norma áli túpkilikti bekitilgen joq. Qazir ony bizdiń sala mamandary qarastyryp jatyr, tiisti memlekettik organdar jumys istep jatyr. Biz osy másele boiynsha Qarjy ministrligine óz pikirimizdi aitýdy josparlap otyrmyz. Bizdiń jumys tobymyz áli jumys istep jatqandyqtan biraz kútý kerek. Bul másele negizinde biryńǵai ustanym ázirleý úshin mamandardan turatyn keńesshi top jumys istep jatyr. Aldyn ala qandai ustanym bolatynyn naqty aita almaimyn. Biraq bul másele talqylaý kezeńinde", – dep jaýap berdi Tamara Dúisenova.
Aita keteiik, buǵan deiin qarjy ministrliginiń memlekettik kirister komiteti Qazaqstanda 255 myń teńgeden asatyn mobildi aýdarymdardy baqylaýǵa alý josparlanyp otyrǵanyn málimdegen edi. Sonymen qatar komitet ókilderi tekserý kriteriileriniń ózgerýi múmkin ekenin atap ótti. Bul túzetý qazir Ulttyq banktiń qaraýynda.
"Bir jeke tulǵanyń bank shotyna qatarynan 3 ai ishinde 100 jáne odan da kóp túrli tulǵalardan jalpy somasy 3 ailyq jalaqy mólsherinen, iaǵni 225 myń teńgeden, asatyn aýdarym qabyldaǵan tulǵany tekserýdi engizý qarastyrady", – dep habarlady memlekettik kirister komiteti.
Qazir bankter úsh ai boiy 100-den astam túrli tulǵadan aýdarym alǵan qazaqstandyqtar týraly málimetterdi salyq organdaryna berýge mindetti. Qoldanystaǵy erejelerge sáikes bul azamattyń zańsyz kásipkerlikpen ainalysyp, taýar nemese qyzmet úshin aqy alyp otyrǵanyn boljamdaýǵa negiz bolady.
Eske salaiyq, buǵan deiin zańǵa sáikes kásipkerlik qyzmetpen tirkeýsiz ainalysatyn barlyq jeke tulǵalar jazalanatynyn jazdyq. Aiyppul 15 AEK (2024 j. 55 380 teńge), bir jyl ishinde qaitalap buzý 30 AEK (110 760 teńge) mólsherinde. Qazaqstanda mobildi aýdarym arqyly qansha kásipkerdiń salyqtan jaltarǵany ázirge belgisiz. Memlekettik kirister komiteti bul aqparatty bankterden 2025 jyly alatynyn atap ótti
