Qazaqstandaǵy qylmystyq isterdiń 18-20 paiyzy elektrondy tártipte tergelip jatyr, dep habarlaidy QazAqparat.
«Ózderińiz biletindei, elimizde «Elektrondy qylmystyq is jobasy» júzege asyrylýda. Joba aiasynda sotqa deiingi qylmystyq isterdiń bárin elektrondy formatqa aýystyryp kelemiz. Iaǵni, quqyqbuzýshylyq tirkelgennen bastap sot sheshim shyǵarǵanǵa deiin barlyǵy elektrondy formatta júrgiziledi. Aldaǵy ýaqytta biz jazany atqarý protsesin avtomattandyrǵymyz keledi. Atalǵan jobanyń bastapqy kezeńderi 2017 jyly bastalǵan bolatyn. 2018 jyldyń 1 qańtarynan bastap joba bastalyp ketti», - dedi OKQ-da Bas prokýratýranyń tsifrlyq jobalaryn tanystyrǵan quzyrly organnyń quqyqtyq statistika jáne arnaiy esepke alý jónindegi komiteti tóraǵasynyń orynbasary Baǵlan Bekbaev.
Quzyrly organ ókiliniń aitýyna qaraǵanda, atalmysh jobany sátti júzege asyrý úshin keibir zańnamalarǵa ózgerister men tolyqtyrýlar engizilgen. Sondai-aq, quqyq qorǵaý organdary arasynda kelisimge qol qoiylǵan.
«2018 jyly biz atalmysh jobany qylmystardyń jeńil túrin tergeý jumystaryna engizdik. Osy jyldan bastap elektrondy formatta ortasha deńgeidegi qylmystar tergele bastady. 2021 jyldyń sońyna deiin qylmystyń barlyq túrin tergeýdi avtomattandyrý kózdelip otyr. Barlyq quqyq qorǵaý organdary atalmysh jumystyń ádisi ońtaily ári qolaily ekenin aitýda. Máselen, 2018 jyldyń birinshi toqsanynda elektrondy qylmystyq isterdiń úlesi jalpy qylmystyq isterdiń ishinde bar-joǵy 0,9 paiyzǵa ie edi. 2018 jyldyń sońynda bul kórsetkish 4,6 paiyzǵa ósti. Al qazirgi tańda barlyq qylmystyq isterdiń 18-20 paiyzy elektrondy tártipte tergelip jatyr», - dedi Baǵlan Bekbaev.
Onyń sózine sensek, atalmysh joba sotqa deiingi tergeý qyzmetkerleriniń jumysyn jeńildetip qana qoimai, qylmystyq iske qatysýshylar men advokattarǵa birqatar basym múmkindikterdi berip otyr.
«Sot óndirisiniń ashyqtyǵy qamtamasyz etilip, materialdy qoldan jasaý táýekelderi azaidy. Tergeý protsesiniń ýaqyty da qysqardy», - dedi ol.
