قازاقستانداعى قىلمىستىق ٸستەردٸڭ 18-20 پايىزى ەلەكتروندى تەرتٸپتە تەرگەلٸپ جاتىر, دەپ حابارلايدى قازاقپارات.
«ٶزدەرٸڭٸز بٸلەتٸندەي, ەلٸمٸزدە «ەلەكتروندى قىلمىستىق ٸس جوباسى» جٷزەگە اسىرىلۋدا. جوبا اياسىندا سوتقا دەيٸنگٸ قىلمىستىق ٸستەردٸڭ بەرٸن ەلەكتروندى فورماتقا اۋىستىرىپ كەلەمٸز. ياعني, قۇقىقبۇزۋشىلىق تٸركەلگەننەن باستاپ سوت شەشٸم شىعارعانعا دەيٸن بارلىعى ەلەكتروندى فورماتتا جٷرگٸزٸلەدٸ. الداعى ۋاقىتتا بٸز جازانى اتقارۋ پروتسەسٸن اۆتوماتتاندىرعىمىز كەلەدٸ. اتالعان جوبانىڭ باستاپقى كەزەڭدەرٸ 2017 جىلى باستالعان بولاتىن. 2018 جىلدىڭ 1 قاڭتارىنان باستاپ جوبا باستالىپ كەتتٸ», - دەدٸ وكق-دا باس پروكۋراتۋرانىڭ تسيفرلىق جوبالارىن تانىستىرعان قۇزىرلى ورگاننىڭ قۇقىقتىق ستاتيستيكا جەنە ارنايى ەسەپكە الۋ جٶنٸندەگٸ كوميتەتٸ تٶراعاسىنىڭ ورىنباسارى باعلان بەكباەۆ.
قۇزىرلى ورگان ٶكٸلٸنٸڭ ايتۋىنا قاراعاندا, اتالمىش جوبانى سەتتٸ جٷزەگە اسىرۋ ٷشٸن كەيبٸر زاڭنامالارعا ٶزگەرٸستەر مەن تولىقتىرۋلار ەنگٸزٸلگەن. سونداي-اق, قۇقىق قورعاۋ ورگاندارى اراسىندا كەلٸسٸمگە قول قويىلعان.
«2018 جىلى بٸز اتالمىش جوبانى قىلمىستاردىڭ جەڭٸل تٷرٸن تەرگەۋ جۇمىستارىنا ەنگٸزدٸك. وسى جىلدان باستاپ ەلەكتروندى فورماتتا ورتاشا دەڭگەيدەگٸ قىلمىستار تەرگەلە باستادى. 2021 جىلدىڭ سوڭىنا دەيٸن قىلمىستىڭ بارلىق تٷرٸن تەرگەۋدٸ اۆتوماتتاندىرۋ كٶزدەلٸپ وتىر. بارلىق قۇقىق قورعاۋ ورگاندارى اتالمىش جۇمىستىڭ ەدٸسٸ وڭتايلى ەرٸ قولايلى ەكەنٸن ايتۋدا. مەسەلەن, 2018 جىلدىڭ بٸرٸنشٸ توقسانىندا ەلەكتروندى قىلمىستىق ٸستەردٸڭ ٷلەسٸ جالپى قىلمىستىق ٸستەردٸڭ ٸشٸندە بار-جوعى 0,9 پايىزعا يە ەدٸ. 2018 جىلدىڭ سوڭىندا بۇل كٶرسەتكٸش 4,6 پايىزعا ٶستٸ. ال قازٸرگٸ تاڭدا بارلىق قىلمىستىق ٸستەردٸڭ 18-20 پايىزى ەلەكتروندى تەرتٸپتە تەرگەلٸپ جاتىر», - دەدٸ باعلان بەكباەۆ.
ونىڭ سٶزٸنە سەنسەك, اتالمىش جوبا سوتقا دەيٸنگٸ تەرگەۋ قىزمەتكەرلەرٸنٸڭ جۇمىسىن جەڭٸلدەتٸپ قانا قويماي, قىلمىستىق ٸسكە قاتىسۋشىلار مەن ادۆوكاتتارعا بٸرقاتار باسىم مٷمكٸندٸكتەردٸ بەرٸپ وتىر.
«سوت ٶندٸرٸسٸنٸڭ اشىقتىعى قامتاماسىز ەتٸلٸپ, ماتەريالدى قولدان جاساۋ تەۋەكەلدەرٸ ازايدى. تەرگەۋ پروتسەسٸنٸڭ ۋاقىتى دا قىسقاردى», - دەدٸ ول.
