Qazaqstandaǵy kitap basý isin ashyq naryqqa jiberý kerek. Bul týraly Senattyń jalpy otyrysynda senator Nurtóre Júsip aitty, dep habarlaidy QazAqparat.
«Qoǵamdyq mańyzy bar ádebietti basyp shyǵarý. Bul da mańyzdy másele. Osyǵan deiin sovet kezinde ómir súrgen jazýshylardyń kitaptary ártúrli seriiamen jylda qaita basylyp keldi. Mundai praktikadan ketý kerek. Ómirge, qazirgi tirshilikke suranysy joǵary kitaptardy basyp shyǵarý qajet. Qazaqstandaǵy kitap basý isin ashyq naryqqa jiberý kerek. Balalar ádebietin qoldaý men damytýǵa salalyq ministrlik basa mán bermese bolmaidy»,- dedi senator «Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» QR Zańynyń jobasyn talqylaý barysynda.
Sondai-aq ol salalyq kórkemdik keńester jumysy durys uiymdastyrylýy tiis ekendigin, kórkemdik keńeske bilikti mamandar tartylýy qajettigin, talǵam men talap kúshti bolýy kerektigin basa aitty.
«Bári mádenietke bailanysty. Ulttyq mádeniet. Rýhani mádeniet. Kúndelikti túrli bylyq-shylyqtyń, jemqorlyqtyń, sybailastyqtyń, ádepsizdiktiń oryn alýy mádeniettiń bolmaýynan. Mádeni deńgeiimizdi kótermeiinshe, kóp nárseni joǵaltamyz. Memleket basshysy Qasym-Jomart Toqaev óz Joldaýynda «Ulttyń jańa bolmysyn qalyptastyrý» týraly aitty. Qazaqtyń ulttyq jańa bolmysyn - mádenietsiz, mádenietti azamattarsyz elestete almaimyz«, - dedi Nurtóre Júsip.
