Foto: 24kz
IIM esirtki qylmysyna qarsy is-qimyl bólinisteriniń qyzmetkerlerimen el aýmaǵynda “Dármek” respýblikalyq jedel-profilaktikalyq is-sharasy ótkizildi, - dep habarlaidy «Ult aqparat» Polisia.kz saityna silteme jasap.
Operatsiiany ótkizý kezinde óz qyzmetinde meditsinalyq preparattardy paidalanatyn 900-ge jýyq kásiporyn men uiymdar tekserildi. Esirtki jáne ýly zattarmen jumys jasaý salasynda 22 qylmystyq quqyq buzýshylyq anyqtalǵan.
"230 adam, onyń ishinde 48 meditsina qyzmetkeri ákimshilik jaýapkershilikke tartyldy. Saqtaý erejelerin buzǵany úshin 43 keli esirtki jáne psihotroptyq zattar, 9 myńnan astam dári jáne meditsinalyq preparattardyń 15 myńǵa jýyq ampýlasy tárkilendi", - delingen habarlamada.
Litsenziialaý normalary buzylǵan jáne tehnikalyq nyǵaitý talaptaryna sai kelmeitin saqtaý obektilerindegi 3 myń tonnadan asa prekýrsordyń ainalymy shekteldi.
"Mysaly, tekserý barysynda Soltústik Qazaqstan oblysynyń ónerkásiptik obektileriniń birinde ýly zattarmen jumys jasaý erejeleri buzylǵany anyqtaldy. Ol jerden 45 keli synap tabylyp, tárkilendi. Sonymen qatar, elordadaǵy meditsinalyq uiymdardyń birin tekserý kezinde esirtki quraldaryn saqtaý jáne joiý erejeleriniń buzylǵandyǵy anyqtalyp, 350 ampýla morfin tárkilendi. Mundai quqyq buzýshylyqtar úshin 160 AEK mólsherine deiin aiyppul nemese 40 táýlikke deiin qamaýǵa alý túrindegi jaza qarastyrylady. Bul baǵytta jumys jalǵasyp jatyr", – dedi departament bastyǵy – IIM resmi ókili Shyńǵys Alekeshev.
