AQSh-tyń Qazaqstandaǵy Elshisi Ýiliam Mozer qazaqstandyqtardy Abai kúni merekesimen quttyqtady. Bul týraly "Ult aqparat" Elshilikke silteme jasap habarlaidy.
«Asa qurmetti qazaqstandyqtar! Sizderdi ózgeshe, jóni bólek merekemen shyn júrekten quttyqtaimyn! Búgin – Abai kúni merekesi! Bul mereke – rýhaniiat pen mádeniettiń, poeziianyń, Abai Qunanbaiuly salǵan jaqsy dástúrdiń jańǵyrýy, jalǵasýy. Biz keleshekte de Elshilikte Abai kúnin atap ótý úshin, Abai dástúrin jańǵyrtqymyz keledi. Abai aqyn Toǵyzqumalaq oinaǵan. Mine, jyl saiyn Toǵyzqumalaqtan jarys uiymdastyrmaq oiymyz bar. Odan keiin, mindetti túrde dastarhan basynda jinalyp, baýyrsaq pen qymyzdy ortaǵa salyp, dombyra shertip, Abai ánderin aitamyz. Abaidyń qara sózderin oqyp, taldaimyz. Abai armandaǵan «Kemel adam tárbieleý» – adamzattyń paryzy. Osyny qazirgi pandemiia jaǵdaiy da qatty túsindirip otyr», - delingen Elshiniń quttyqtaýynda.
Sonymen qatar, Almatydaǵy AQSh Bas Konsýly Erik Maier de uly Abaidyń mereitoiyna arnalǵan quttyqtaýlarǵa qosylyp, aqynnyń ómirbaiany men shyǵarmashylyǵyn tanyp bilýge degen yntasy jaiynda aityp, Abaidyń «Júrekte qairat bolmasa» óleńin amerikalyq áriptesterimen birge oqydy.
Aita keteiik, ótken aptada áleýmettik jeli qoldanýshylaryn qazaq tilinde oishyl Abaidyń shyǵarmashylyǵyn oryndap, oqyrmandardy tánti qylǵan amerikalyqtar Fulbright Foreign Language Teaching Assistant qatarynan. FLTA- bul AQSh Memlekettik departamentiniń qazaqstandyqtarǵa AQSh-qa baryp, qazaq tilin oqytýǵa múmkindik beretin biregei baǵdarlamasy. Baǵdarlama kezinde qazaq tilin oqyp, mádenietimen tanysqan amerikalyqtar Qazaqstanǵa kelip, aǵylshyn tilin úiretedi.
«Júrek— teńiz, qyzyqtyń bári — asyl tas» óleńin Fýlbrait baǵdarlamasynyń qatysýshysy, eki jyl boiy AQSh-ta qazaq tilin oqyp, keiin Aqtaýda aǵylshyn tilinen sabaq bergen Abigail oqydy.
«Óleń sózdiń patshasy» atty óleńdi Qazaqstannan Fulbright FLTA baǵdarlamasymen barǵan Qazaqstandyq muǵalim Ǵaliia Dáýlettiń kómegimen tildi úirengen Liýdvig oqyp berdi.
«Erekshe esten ketpes qyzyq qaida?» oqyǵan Brett Vestbrýkke Fulbright FLTA baǵdarlamasy boiynsha barǵan Asem Ijmýhanova sabaq berdi.
«Ǵylym tappai maqtanba» – Fulbright FLTA stýdentteri Djoshýa Diýfo men Djessi Ýesso oqydy.
«Júrekte qairat bolmasa» – Brendis qazaq tilin jaqynda ǵana oqi bastasa da, asa zeiin qoiyp, tamasha nátije kórsetip úlgerdi.
«Kózimniń qarasy» ánin shyrqaǵan amerikalyq Grei Garret, Abaidyń tanymal ánin ýkýlelede ornap, ony kóptegen elderde shyrqaǵanyn esterińizge taǵy da salamyz.
Qazaqstandaǵy Amerika Buryshtarynda (American Corner and MakerSpace) da uly Abaidyń mereitoiyn atap ótý úshin, aqyn salǵan ádet-dástúrdi, onyń filosofiiasyn jalǵastyrý, jańǵyrtý jáne dáripteýge, Abaitanýǵa arnalǵan is-sharalar júrgizilip jatyr.
