Biyl elimizdegi 10 munai jáne gaz jer qoinaýy ýchaskeleri onlain-aýktsion arqyly satylady. Bul týraly QR Energetika vitse-ministri Janat Jahmetova aitty, dep habarlaidy "Ult aqparat".
Onyń aitýynsha, osy jyldyń 1 qyrkúieginen bastap jer qoinaýyn paidalaný quqyǵyn alýǵa múddeli tulǵalar aýktsion ótkizýge onlain rejiminde ótinish bere alady.
«2020 jyly Qazaqstanda 10 munai-gaz jer qoinaýy ýchaskesin elektrondyq aýktsion arqyly satý josparlanýda. Olardyń qol qoiý bonýsynyń jalpy bastapqy mólsheri 400 mln teńgeni quraidy. Qazirgi ýaqytta aýktsionǵa qatysýǵa 30-dan astam ótinish kelip tústi», - dedi Janat Jahmetova Ortalyq kommýnikatsiialar qyzmetindegi baspasóz máslihatynda.
Vitse-ministrdiń sózine qaraǵanda, kómirsýtekterdi igerý jáne óndirý úshin memleket usynatyn ýchaskelerdiń jalpy aýdany shamamen 29 myń sharshy shaqyrymdy quraidy.
«Elektrondyq saýda-sattyqty ótkizý 2020 jylǵy 23 jeltoqsanǵa josparlanǵan Qatysýǵa ótinimder 29 qarashaǵa deiin qabyldanady. Bul igerý quqyǵy elektrondyq tásilmen iske asyrylatyn alǵashqy ýchaskeler bolyp sanalady. Osy ýaqytqa deiin aýktsiondar «kózbe-kóz» rejimde ótken edi. Qatysýshylarǵa, tipti eger igerýge sheteldik kompaniia úmitker bolǵannyń ózinde aýktsion zaldaryna barý qajet bolatyn. Endi karantinge bailanysty jáne kóptegen halyqaralyq áýe reisteri toqtatylǵan kezde saýda-sattyq elektrondyq tásilmen júrgiziledi. Bul memlekettik organdardy da, biznesti de aitarlyqtai operatsiialyq shyǵyndardan bosatady», - dedi ol.
