Jyl saiyn Qazaqstanda balalaryna durys qaramaǵan myńǵa jýyq adam ata-analyq quqyǵynan aiyrylady.
Bul týraly QR IIM Iývenaldyq politsiia jáne áielderdi zorlyq-zombylyqtan qorǵaý basqarmasynyń basshysy Áset Ospanov málim etti, dep habarlaidy QazAqparat.
Ata-ana quqyǵynan aiyrý uzaq protsess ekenin toqtalǵan ol, «Onyń basty sebebine toqtalsaq, balanyń ata-anasy ishimdikke salynyp, bala tárbiesimen ainalyspaidy. Ata-ana quqyǵynan aiyrý týraly máseleni kótermes buryn bul otbasylar tiisti merzimde politsiia organdarynda esepte turady. Osy oraida profilaktikalyq sharalar júrgiziledi», - dedi.
Eń aldymen, óz mindetin durys atqarmai júrgen ata-analar esepke qoiylady. Sol otbasymen profilaktikalyq jumys istep, turǵylyqty úi-jaiy tekseriledi. Tiisti jumystardan soń olarmen jeke áńgime júrgizilip, ata-analarǵa nusqaýlyq beriledi.
«Ókinishke qarai, jyl saiyn osy sebepterdiń saldarynan elimizde myńǵa jýyq otbasy ata-quqyǵynan aiyrylady», - dep naqtylady Á. Ospanov.
Óz kezeginde QR BǴM Balalardyń quqyqtaryn qorǵaý komiteti tóraǵasynyń mindetin atqarýshy Dýlat Jekebaev ata-analardy jumyspen qamtý, em-dom qabyldaýǵa jiberý múmkindikteri eskeriletinin atap ótti.
«Alaida balanyń qaýipsizdigine qater týsa, sot arqyly ata-analyq quqyǵynan aiyrý májbúrli qadamyna baramyz. Keiinnen bul ata-analar jaǵdaidy túzetý múmkindigine ie. Emdelip, jumysqa tursa ári turǵylyqty baspanasyn jaqsartsa, onda memleket komissiialyq tártipte ata-ana quqyǵyn qaitarýdy qarastyrýǵa daiyn ekenin atap ótken jón», - dedi D. Jekebaev.
