Elimizde jyl saiyn 5 myńǵa jýyq jasóspirim qyz júkti bolady. Bul týraly búgin BAQ ókilderimen kezdesken QR Densaýlyq saqtaý ministri Eljan Birtanov aitty, dep habarlaidy QazAqparat.
«Bul máselemen biz úkimettik emes uiymdarmen, halyqaralyq uiymdarmen birlesip ainalysyp jatyrmyz. BUU-da kómektesedi. Olardyń derekterine sáikes, 16-18 jas aralyǵynda jasóspirim qyzdardyń júkti bolýynyń 4 800-5 000 deregin tirkeimiz. Ókinishke qarai, erte jynystyq ómirge aralasý faktileri bar. Buǵan qosa, jyl saiyn shamamen dál osy sanattaǵy turǵyndardyń 1200-1300 túsik jasatýy tirkeledi. Árine, olardyń barlyǵy da meditsinalyq kórsetilim men qarsy kórsetilimge sai qaýipsiz jaǵdaida, qorǵalǵan túrde júrgiziledi», - dedi ol.
Onyń aitýynsha, túsik jasatý zańdy túrde júrgizilýi qajet. Dárigerler mundai jaǵdaidy baqylaýynda ustap otyrýy tiis.
«Júkti qyzdy ýchaskelik dáriger nemese emhanalardyń janynan qurylatyn Jasóspirimder densaýlyǵy ortalyǵynyń dárigeri mundai sheshimdi ata-anasynyń qabyldaýyna kóndirý qajet. Olar nege jáne qandai qaýpi bar ekendigin túsindirýi tiis. Meditsinalyq mekemeden tys jaǵdaida júktilikti úzý óte qaýipti. Qyzdar densaýlyǵyna nuqsan keltirýmen qatar, bolashaqta ana bolý quqyǵynan, tipti ómirlerinen aiyrylýy múmkin. Mundai problema bar jáne oǵan kóz juma qaraýǵa bolmaidy. Keibireýler muny mekteptiń emes, ata-ananyń máselesi ekendigin aitady. Alaida, ókinishke qarai ata-analardyń barlyǵy bul jaǵdaidy jete túsine bermeidi. Sondyqtan biz kodekske mektepterge naqty jaýapkershilik júktep, baǵdarlama júrgizýdi usyndyq. Sóz reprodýktivti densaýlyqty qorǵaý jaiynda bolyp otyr», - dedi Eljan Birtanov.
