Ortalyq kommýnikatsiialar qyzmetinde ótken brifingide Orman sharýashylyǵy jáne janýarlar dúniesi komiteti tóraǵasynyń mindetin atqarýshy Erlan Qutpanbaev zańsyz aǵash kesýshilerge qarsy kúresip jóninde baiandady, dep habarlaidy QazAqparat.
«Jyl basynan osy ýaqytqa deiin elimiz boiynsha 8192 reidtik shara ótkizilgen. Sonyń arqasynda 57 zańsyz aǵash kesý oqiǵasy tirkeldi. Keltirilgen shyǵynnyń kólemi – 15,3 mln teńge. Onyń 4 mln teńgeden astamy óndirip alyndy. Jalpy 57 oqiǵanyń 30-y quqyq qorǵaý organdaryna joldandy. Sotqa jiberilgeni – 22. 7 qylmystyq is qozǵalǵan. Zańsyz aǵash kesý kezinde keltirilgen shyǵynnyń jalpy somasy 100 AEK-ten assa, qylmystyq is qozǵalady. 100 AEK-ke deiingi shyǵyndar sotta qaralady», - dedi komitet basshysy.
Sondai-aq, ol órtengen orman alqaptaryn qalpyna keltirýdiń tártibin túsindirdi.
«Órtengen orman alqaptarynyń orny ekinshi jyly túgeldei tazartylady. Osydan keiin ǵana alqapty jańartý jumystary bastalady. Iaǵni, jańa tal egý bastalady. Bul jerde Qazaqstannyń orman qoryn quraityn aǵashtar egiletinin aitý kerek», - dedi komitet tóraǵasynyń mindetin atqarýshy.
Orman sharýashylyǵy jáne janýarlar dúniesi komiteti tóraǵasynyń mindetin atqarýshy Erlan Qutpanbaevtyń aitýynsha, vitse-ministr aityp otyrǵan joba 2030 jylǵa deiin iske asyrylady.
«Araldyń qańsyǵan tabanynda sekseýil egý 1980 jyldan bastap júrgizilip keledi. Búginge deiin ondaǵy ormandy alqaptyń jalpy kólemi 337 myń gektardan asty. Kóktemde arnaiy ekspeditsiia uiymdastyryldy. Ekspeditsiia músheleri qańsyǵan alqaptardyń birazy aralap ótti. Qazirgi ýaqytta izdestirý jumystary júrgizilip jatyr. Ormanǵa jaramdy jerlerdiń bári izdestirý jumystarynan keiin anyqtalady. 2030 jylǵa deiin 1 mln gektardan astam jerge sekseýil egý josparlanǵan», - dedi ol.
