Ishki ister ministrligi «Balalarǵa qamqorlyq jasańyz» filmin jariialady. Onda kámeletke tolmaǵandarǵa qarsy zorlyq-zombylyq taqyryby kóteriledi, dep habarlaidy Polisia.kz.
Materialda qylmystyq málimetterden sońǵy statistika keltirilgen. IIM resmi statistikasy boiynsha, 2020 jylǵy qańtar-tamyz aralyǵynda kámeletke tolmaǵandarǵa jynystyq qolsuqpaýshylyqqa qarsy 550 qylmys jasalǵan.
Onyń kópshiligi, iaǵni 250 fakti - kúsh qoldaný, bopsalaý, qorqytý nemese balanyń dármensizdigin paidalaný arqyly absoliýtti zorlyq-zombylyq jaǵdailary. Bul qylmystardyń jartysynan kóbin balanyń jaqyn ortasyndaǵy adamdar jasaidy. Jábirlenýshi, ádette, 14 jastan aspaidy.
IIM mamandary quqyq qorǵaý organdary osy qylmystardyń saldarymen kúresip jatqanyn jáne politsiianyń kúsh-jigerimen, jazany qatańdatýmen ǵana bul másele sheshilmeitinin atap kórsetedi.
– Balalarǵa, onyń ishinde seksýaldyq zorlyq-zombylyq úshin jaýapkershiliktiń kúsheiýine qaramastan, mundai faktilerdiń sany azaimai otyr. Bul – azaptaý, uryp-soǵý, bopsalaý, qaýip-qaterli jaǵdaida qaldyrý. Olardyń úshten biri jynystyq qol suǵylmaýshylyqqa qatysty, – dep atap ótti Ishki ister ministri Erlan Turǵymbaev.
Filmde zorlaýshynyń jalpy portreti, azamattardyń qai sanattary mundai qylmystardy jii jasaityny sýrettelgen. Sondai-aq, materialda jábirlenýshini ońaltý máseleleri qarastyrylǵan.
Politsiia qyzmetkerleri qoǵamda jynystyq tárbie taqyrybynyń jabyq ekenin, iaǵni eresekter balalarǵa qarsy jasalǵan qylmys faktilerin jasyratyny týraly máseleni kóteredi.
IIM qazaqstandyqtarǵa «Balalardy birge qorǵaimyz» degen úndeý tastap, azamattardy kámeletke tolmaǵandarǵa qatysty zorlyq-zombylyq máselesin ashyq talqylaýǵa shaqyrady.
