Foto: @gubdaily.ru
Qazaqstanda óz mindetterin oryndamaityn myńdaǵan ata-ana esepke qoiyldy. Olardyń ishinde júzdegen adam ata-ana quqyǵynan aiyrylýy múmkin, dep habarlaidy Sputnik Qazaqstan.
Ákimshilik politsiia komitetiniń erekshe tapsyrmalar jónindegi aǵa inspektory Aqmaral Serikbaevanyń aitýynsha, óz balalaryn tárbieleý boiynsha mindetterdi oryndamaityn 8 myń ata-ana esepke alyndy. Sonyń ishinde 1 057 ata-ana ákimshilik jaýapkershilikke tartyldy. Barlyǵyna 36 920 teńgeniń aiyppuly salyndy. Al 201 fakti boiynsha kámeletke tolmaǵandardyń isteri jónindegi komissiiaǵa ata-ana quqyǵynan aiyrýǵa materialdar jiberildi.
"Mysaly, Petropavlda jas ana emhanaǵa shaqyrylǵan ýaqytta balasyn alyp kelmei júrgeni týraly pediatrdan habarlama kelip tústi. Tekserý kezinde jas ananyń ishimdik ishkeni, náresteniń shuǵyl kómekke muqtaj ekeni belgili boldy. Politsiia balany náresteler úiine ornalastyryp, al anasyn narkolog dárigerdiń esebine qoidy jáne ákimshilik jaýapkershilikke tartty", - dedi Serikbaeva búgingi onlain brifingte.
Onyń aitýynsha, sot sheshimimen alkogolizmmen aýyratyn 206 adam narkologiialyq uiymdarǵa májbúrlep emdeýge jatqyzyldy. Al qorǵaý nusqamasyn buzǵany úshin 557 agressor jáne minez-qulyqqa qoiylǵan erekshe talaptardy oryndamaǵany úshin 531 quqyq buzýshy qamaýǵa alyndy.
