Prokýrordyń qaýlysyn oryndamaǵany úshin jaýaptylyq belgilenedi. Bul týraly «Qazaqstan Respýblikasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasyn talqylaý kezinde depýtat Gúlnar Bijanova málim etti, dep habarlaidy QazAqparat.
«Eńbek zańnamasyna aǵymdaǵy jyldyń qańtarynda «jiberýshi» jáne «qabyldaýshy» taraptar degen jańa uǵymdar engizildi, olardyń quqyqtary men mindetteri bekitildi. Osyǵan bailanysty taraptar jumyskerlerdiń zańdy quqyqtary men múddelerin saqtamaǵany úshin ákimshilik jaýaptylyqty kózdeý usynylady. Jaýaptylyq qyzmet kórsetý shartyn jasasý kezinde de, onyń qoldanylý kezeńinde de taraptardy tártipke shaqyratyn bolady. Teń eńbek úshin teń eńbek jaǵdailaryna konstitýtsiialyq kepildikterdi qamtamasyz etedi. Sondai-aq, jiberýshi taraptyń jumyskerleri úshin zańnamada kózdelgen jumys ýaqyty men kúndelikti jumystyń qalypty jáne qysqartylǵan uzaqtyǵyn zańsyz asyrǵany úshin qabyldaýshy taraptyń ákimshilik jaýaptylyǵyn belgileý usynylady», - dedi G. Bijanova Májilistiń jalpy otyrysynda.
Budan bólek, Memleket basshysy qyrkúiek aiyndaǵy Joldaýynda kásipkerlerdiń quqyqtaryn qorǵaýdy kúsheitýge erekshe nazar aýdardy. Mundai baǵyt qadaǵalaý organyna qosymsha talaptar qoiady.
«Zań boiynsha, prokýrorǵa óz qaýlysymen barlyq zańsyz sheshimderdiń kúshin tez arada joiý, sondai-aq memlekettik organdardyń negizsiz aktilerin toqtata turý quqyǵy berilgen. Alaida, olardy oryndamaǵany úshin ákimshilik jaýaptylyq kózdelmegen. Bul azamattar men biznestiń zańdy quqyqtary men múddelerin qorǵaý isinde prokýrordyń quqyq qorǵaý fýnktsiiasyn tómendetedi. Osyǵan bailanysty biz prokýrordyń qaýlysyn oryndamaǵany úshin ákimshilik jaýaptylyq belgileýdi usynamyz», - dedi depýtat.
