Sońǵy bir táýlikte Qazaqstanda reseilikterdiń jeke sáikestendirý nómirin rásimdeý kórsetkishi kúrt artqan. Bul týraly QR Tsifrlyq damý, innovatsiialar jáne aeroǵarysh ónerkásibi vitse-ministri Áset Turysov aitty, dep habarlaidy QazAqparat.
«Qazirgi kezde elimizde rezident emes adamdarǵa JSN berý eńbek sharttaryn bekitýge, kórsetilgen qyzmetter úshin qarajat alýǵa, ákimshilik jazaǵa tartýǵa, salyq eseptiligin júrgizýge, sondai-aq túrli bank operatsiialaryn júrgizý úshin kerek. Qazaqstan Respýblikasynda ýaqytsha bolatyn sheteldikter men azamattyǵy joq adamdarǵa JSN berý qyzmeti «Azamattarǵa arnalǵan úkimet» memlekettik korporatsiiasy arqyly kórsetiletinin atap ótkim keledi. JSN 1 jumys kúni ishinde daiyndalady. Beirezidenttiń qolynda pasport bolýy qajet, onyń ókili júgingen jaǵdaida notarialdy kýálandyrylǵan senimhat qajet», - dedi Áset Turysov Ortalyq kommýnikatsiialar qyzmetinde.
Osy oraida ol sońǵy kúnderi Qazaqstanǵa kelip jatqan Resei azamattarynyń sany artqanyn eske saldy. RF azamattary beirezidentke arnalǵan JSN alý úshin jappai HQKO-ǵa baryp jatyr. Sonyń saldarynan HQKO-larǵa júktemeniń artqany baiqalyp otyr.
«Qazirgi ýaqytta JSN alý úshin kelgen reseilikterdiń basym bóligi Astana men Almatyda jáne shekaralas qalalarda kóp baiqalǵan. Keshe ǵana elimiz boiynsha 13 myńnan astam ótinim qabyldandy. Osyǵan deiin shamamen mundai kórsetkishtegi ótinimdi bir ai boiy qabyldaitynbyz», - dedi vitse-ministr.
Buǵan deiin sheteldik azamattarǵa qyzmet kórsetý úshin TsDIAÓM Astana men Almatyda, sondai-aq Qostanai, Batys Qazaqstan, Soltústik Qazaqstan, Pavlodar, Aqtóbe jáne Aqmola oblystarynda jekelegen HQKO-lar jumysyn kúsheitý týraly sheshim qabyldaǵany aitylǵan edi.
